"Kəpəz" - "Qarabağ" oyununda kütləvi davaya nə səbəb olub? - AÇIQLAMA
U-17 liqasının 5-ci turunun “Kəpəz” – “Qarabağ” qarşılaşmasında kütləvi dava baş verib.
Oyunun 86-cı dəqiqəsində baş verən gərginlik zamanı baş hakim “Kəpəz”in 4, “Qarabağ”ın isə 3 futbolçusunu qırmızı vərəqə ilə cəzalandırıb. AFFA-nın İntizam Komitəsinin son iclasında isə həmin futbolçulara 6 oyunluq cəza verilib.
Maraqlıdı, kütləvi davaya nə səbəb olub?
Bu haqda məlumat almaq üçün “Qarabağ”ın U-17 komandasının baş məşqçisi Samir Musayevlə əlaqə saxladıq. Onun “Football-plus.az” saytına açıqlaması belə oldu: “Uşaqlar arasında yüngülvari çəkişmə oldu. Futbolda olan şeydi. Kütləvi dava deyildi. Bir epizodda futbolçular arasında gərginlik yarandı. Qalanları da qatıldı və bir az böyüdü. Amma qərarda onu çox şişirdib yazıblar. Bizim yanımızda kütləvi dava ola bilər? Yenə deyirəm, çəkişdilər bir az, 3-4 dəqiqəyə də ayırdıq, bitdi. Hakim 7 oyunçuya qırmızı vərəqə verdi. Amma fikrimcə, 6 oyunluq cəza çoxdu. Çempionatda oyunların sayı artırılır ki, uşaqların təcrübəsi çox olsun. Bir tərəfdən də 6 oyunluq cəza gəlir. Bu, ayyarım oynamamaq deməkdi. Onların arasında içində yığma üzvləri də var. Klubda 6 oyun oynamayandan sonra gedib yığmada hansı keyfiyyti göstərə biləcəklər? Klub onsuz da həmin futbolçuların cəzasını verir. Futbolu təzə-təzə inkişaf etdirməyə çalışırıq. Bir az gərginliyə, dartışmaya görə 6 oyunluq cəza olmaz axı”.
ŞAİR ABDULLA
Digər xəbərlər
