Danimarkalı vəkil və siyasətçi Rasmus Paludan Stokholmdakı Türkiyə səfirliyinin qarşısında "Qurani-Kərim" kitabını yandırması İslam dünyasında etirazla qarşılanıb.

Özü də bu onun ilk belə addımı deyil. O, 2019-cu ildə Danimarkada və ötən il İsveçdə də “Qurani-Kərim”i yandırıb. Paludan etdiyi əməldən peşman olmadığını, əksinə fikir azadlığından geniş şəkildə istifadə etməklə qürur duyduğunu açıqlayıb. Siyasətçi 4 ildən çoxdu güclü polis qoruması altındadı və şəhərdə gəzərkən onu bir neçə asayiş keşikçisi mühafizə edir. Onu da xüsusi vurğulayaq ki, İsveçdə dini kitabları yandırmaq, insanların inanclarını aşağılamaq qanun pozuntusu sayılmır. Bu hadisə Azərbaycanda da xoş qarşılanmayıb.

Football-plus.az olaraq ölkədə ibadət əhli olan bir qrup mütəxəssis və futbolçunun məsələyə reaksiyasını öyrəndik.

Xaliq Mərdanov ("Kəpəz-2"nin baş məşqçisi): "Baş vermiş hadisəyə görə olduqca narazıyam və buna etirazımı bildirirəm. Müsəlmanların inancını aşağılamağa, müqəddəs kitabı yandırmağa heç bir vasitəylə haqq qazandırmaq olmaz. Burda demokratiyadan söhbət gedə bilməz. Həmin şəxs tək kitabı yox, Allahın kəlamlarını yandırdı. Belə hərəkət edənlərin də aqibəti nə bu dünyada, nə də axirətdə yaxşı olacaq".

Azər Bağırov ("Araz Naxçıvan"ın baş məşqçisi): "Quran”ı yandıran şəxslər öz zəifliyini, acizliyini, həqiqətləri görə bilmədiyini göstərir. İnsanlarda qəzəb yaratmaqla İslamı insanlığın düşməni kimi gözə soxmağa çalışır. Nəinki müqəddəs kitabları, adi bir kitabı belə cırmaq, yandırmaq düzgün deyil. İsveçdəki olayı demokratiya, fikir azadlığı kimi təqdim edənlər var. Amma bu, sadəcə, qanunsuzluğa, insanların inanclarının aşağılanmasına haqq qazandırmaqdı. Bizim dinimizdə “Zəbur”u, “Tövrat”ı, “İncil”i belə sevməli, hörmət etməli, qorumalı olduğumuz vurğulanır. Bu müsəlmanların başqa dinlərə hörməti, o da onların... Təbii ki, bəzi şəxslərə, qruplara görə mən bütün xalqı, xristianları pisləməyi nəzərdə tutmuram. İsveçdə baş verən hadisəni növbəti siyasi oyun sayıram. Burda da əsas məqsəd İslama və müsəlmanlara nifrət yaratmaqdı. Biz müsəlmanlar da bunun təxribat olduğunu yaxşı anlayırıq. İslamı nə qədər gözdən salmağa çalışsalar da, insanlar ona bir o qədər maraq yaradır. Allahın kəlamının, nurunun qarşısını almaq mümkün deyil".

İlkin Qırtımov (“Qəbələ”nin futbolçusu): "İstər xristian, istər müsəlman, istərsə də bütpərəst olsun, insanların etiqadını aşağılamaq, təhqir etmək olmaz. Odu ki, İsveçdə baş verən hadisəni qətiyyətlə pisləyirəm".

Əfran İsmayılov (“Kəpəz”in sabiq futbolçusu): "Söhbət hansısa kitabın yandırılmasından yox, yüz milyonlarla müsəlmanın müqəddəs kitabının aşağılanmasından və təhqirdən gedir. O kitab ki, insanlara doğrunu, həqiqətləri, haqqı batildən ayırmağı öyrədir. Dünyada “Quran”a bərabər və ondan üstün kitab yoxdu. Bizim inancımız tək “Quran”ı yox, Allahın endirdiyi bütün kitabları qorumağı və müsəlman olmayan insanların dinlərinə, inanclarına hörmət etməyin vacibliyini buyurur. “Quran”ı yandıran insan ya axmaqdı, ya psixoloji problemlər var, ya da bədniyyətlidi. Yoxsa heç bir ağlı başında, özünə hörmət edən kəs milyonlarla insanın inancını aşağılamaz. Bu əmələ də heç cür demokratiya, fikir azadlığı deyilə bilməz. Bunun bir adı var - təhqir".

Rahid Əmirquliyev (“Səbail”in futbolçusu): "İsveçdə məlum şəxs tərəfindən müqqəs kitabımızın yandırılmasını kəskin pisləyirəm. Bu, dünya müsəlmanlarına təhqirdi. Bunun da arxasında hansısa təxribatlar, qarayaxmalar, müsəlmanlarla qeyri-müsəlmanları qarşı-qarşıya qoymaq planlarının olduğunu düşünürəm. Siyasi, dövlət maraqları insanların dini inancını aşağılmağa, təhqir etməyə əsas vermir. Bu tək İslamı yox, başqa dinləri aşağılayanlara da aiddi. Hər kəs inancında, ibadətində sərbəstdisə, demokratiya fərqli inancda olanların bir-birinə hörmət etməsini aşılamalıdı, fikir azadlığı adı altında aşağılayıcı hərəkətlətə rəvac verib qarşıdurma yaratmağı yox. İnşallah, bu olaydan daha böyük xoşagəlməz hadisələrə keçid olmaz".

ABDULLA İSMAYILOĞLU