Türkiyə yığmasının üzvü və ''Feyenoord''dun yarımmüdafiəçisi Orkun Kökçü bu aralar Niderlandda ən çox müzakirə olunan futbolçulardan biridi.

Məsələ burasındadı ki, ötən həftəsonu keçirilən 10-cu turda erediviziya klublarının kapitanları ölkədə LQBT-yə dəstək üçün təşkil olunan ''National Coming Out Day'' yürüşünə diqqət çəkmək üçün göyqurşağı rəngində sarğılar taxmalı idilər. Amma Orkun dini səbəblər üzündən bu rəngdə sarğını taxmaqdan imtina etmiş və onun bu addımı ölkədə müzakirələrə səbəb olmuşdu. Atası Halis Kökçü bu addımına görə oğlu ilə qürur duyduğunu bildirmişdisə, baş məşqçi Arne Slot da insanları türkiyəli oyunçunun dini inanclarına hörmətlə yanaşmağa çağıraraq onun tərəfini tutmuşdu. Bu üzdən ötən həftə ''Alkmaar''la səfər oyununda kapitan sarğısını Gerno Trauner taxmışdı. Rotterdamlıların 3:1 hesabı ilə qalib gəldiyi həmin qarşılaşmada Kökçü 1 qol, 1 məhsuldar ötürmə ilə fərqlənmişdi. Dünən ''Feyenoord'' 11-ci turda öz meydanında Burak Yılmaz və Oğuzhan Özyakupun şərəfini qoruduğu ''Fortuna'' ilə qarşılaşdı. 1:1 hesabı ilə bitən oyunda artıq kapitan sarğısını yenə də Orkun taxmışdı. Qarşılaşmadan sonra istedadlı futbolçu jurnalistlərin bu olay ilə bağlı çoxsaylı suallarına belə cavab verdi: ''Həyatda hər kəs özünə necə rahatdısa, elə də hərəkət edir. Bu olayda özümə yaxın olmaq və özüm kimi qalmaq istədim. Mən sadəcə dini inancıma uyğun gəlməyən bir şeyi etmək istəmədim. Hər kəs bir-birinə hörmətlə yanaşmalıdı. Bu qərarıma görə çox tənqid olunacağımı bilirdim və belə də oldu. Amma bu yolu özüm seçdim. İnancımla bağlı irəlilədiyim yoldan heç vaxt geri addım atmaram. Açığı, insanların bu mövzuda fikirləri mənə çox da maraqlı deyil''.

Qeyd edək ki, ''Feyenoord''un liderlərindən sayılan Orkunun aktivində bu mövsüm 14 rəsmi oyunda 5 qol, 2 məhsuldar ötürmə var. Klubu ilə 2025-ci ilə qədər müqaviləsi olan Kökçü Dortmund ''Borussiya''sı və ''Arsenal''ın hədəfindədi.