Kərim Benzema fikrini dəyişib. “Real”ın hücumçusu Fransa millisindən olan sabiq oyundaşı Matye Valbuenanı şantaj etməklə bağlı aldığı cəzadan apellyasiya şikayəti etməmək qərarına gəlib.

Məlumatı “Ekip” qəzeti yayıb. 34 yaşlı hücumçu 2015-ci ildə Valbuenanı onun intim xarakterli videosu ilə şanstaj edilməsində vasitəçi rolunu oynamışdı. Ötən ilin noyabrında Versal məhkəməsi onu bir il şərti həbs və 75 min avro cərimə cəzasına məhkum etmişdi. Vəkilləri Benzemanın bu qərarlarla razılaşmadığını və apellyasiya şikayəti edəcəyini bildirmişdilər. Şikayətə iyunun 30-da və iyulun 1-də baxılması nəzərdə tutulurdu. Lakin Kərim çox götür-qoydan sonra şikayətini geri götürməyi lazım bilib. Vəkili Valbuenanın şantaj əhvalatı ilə bağlı məsələnin onu yorduğunu, amma bu addımının heç də günahını etiraf etməsi ilə bağlı olmadığını da deyib.

Xatırladaq ki, Fransa ictimaiyyətində böyük ajiotaj doğuran qalmaqal hər iki təcrübəli futbolçunun karyerasına mənfi təsir göstərmişdi. Matye ilə Kərim vətənlərində keçirilən AÇ-2016-da iştirak edə bilməmişdilər. Fransanın çempion olduğu DÇ-2018-dən də kənarda qalan Benzema milli komandadakı çıxışını yalnız 2021-ci ildə bərpa edə bilmişdi.