“Turan Tovuz”la matçda fərqlənən Musa Qurbanlı oyundan sonra jurnalistlərin suallarını cavablandırdı.

Mövsümdə 13-cü qolunu vuran forvard “Poqon” məsələsinə aydınlıq gətirməklə yanaşı, qış fasiləsində Fransa səfərinə də toxundu.

- Fasilədən sonra ilk matç adətən çətin olur. Üstəlik, üçhəftəlik Antalya toplanışından birbaşa bura gəldiz və süni qazonda oynamalı olduz. Bütün bunlar nə dərəcədə çətinlik yaratdı?
- Bizim üçün bir az çətin idi. 20 gündən çox təlim-məşq toplanışında olduq. Amma bütün bunlar çempionatın ikinci yarısına daha yaxşı hazırlaşmağımız üçün idi. Matç ağır keçdi. Bütün komandalar qış toplanışından yaxşı qayıdıblar. Rəqibimiz oyuna çox yaxşı hazırlaşmışdı. Bizə yaxşı müqavimət göstərdilər. Son dəqiqələrdə vurduğumuz qolla qələbə qazandıq. Xarakter göstərdik.

- Bölgədə belə azarkeşlərin qarşısında oynamaq necədi?
- Belə ab-havada oynamaq mənim üçün xoşdu. Tovuzda futbolu sevirlər, komandalarını yaxşı dəstəkləyirlər. Biz də futbolçu kimi bundan həzz alırıq. Meydanda ab-hava nə qədər gözəl olsa, bizim üçün xoşdu. Rəqib azarkeşləri olmasına baxmayaraq, futbolun gözəlliyini hiss edə bilirik. Sadəcə, oyun saat 2-də və süni örtüklü meydanda baş tutdu. Bu, bəzi çətinliklər yaradırdı. Amma bunun öhdəsindən gəldik və qələbə qazandıq.

- Qış fasiləsi ərəfəsində adın Polşa "Poqon"u ilə yanaşı hallanırdı. Bu məsələ nə yerdə qaldı?
- Açığı, bununla şəxsən maraqlanmadım. Klub rəhbərliyi, baş məşqçimiz, belə məsələlərlə məşğul olan adamlar var. Mənə maraqlı da deyildi. Açığı, bu haqda mənə heç bir məlumat verilməmişdi, mediadan oxuyurdum. Necə məsləhət bildilərsə, elə də oldu. Hazırda yalnız "Qarabağ"ın uğurlarını düşünürəm. Öz üzərimdə çalışıb həm özüm, həm də klubum üçün ən yaxşısının olmasını istəyirəm.

- Yaxın gələcəkdə legioner həyatı yaşamaq arzun var? İngilis dili biliyin necədi?
- Əlbəttə, bütün futbolçular daha yaxşı yerlərdə olmağı istəyir. Mənim də arzum və məqsədim daha böyük liqalarda, klublarda oynamaqdı. Necə olacağını isə artıq zaman göstərəcək. Əsas odu ki, üzərimdə çalışıram. Dil bilgilərimə gəlincə, rus və ingilis dilini yaxşı bilirəm.

- Qış fasiləsində komandanızdan gedən Kadi Borgesin yeri görünürdü?
- Kadi bizim üçün vacib oyunçu idi. Onu çox istəyirdik, öyrəşmişdik ona. Amma bu futboldu, belə də olur. Futbolçu həmişə bir klubda qalmır. Kadiyə uğurlar arzulayıram. Biz də onun yoxluğunun hiss olunmaması üçün əlimizdən gələni edirik.

- Artıq "Qarabağ"da "9” nömrəli formanı geyinirsən. Bunun xüsusi özəlliyi var?
- “9” sırf mərkəz hücumçusunun nömrəsidi. Mən də uşaqlıqdan - akademiyada, millilərdə bu formanı geyinmişəm. Bildiyiniz kimi, atam da “9” nomrə ilə oynayıb. Bu nömrə ilə oynamaq mənim üçün xoş oldu. Həm də əlavə motivasiya olacaq.

- Bu vaxta qədər "Qarabağ"da “9” nömrə boş idi. Niyə götürmürdün?
- Belə məsləhət bilinmişdi. İndi alındı və götürdüm.

- Ramil Şeydayevlə aranızda amansız bombardirlik mübarizəsi gedir. Bununla bağlı zarafatlarınız, atmacalarımız olur?
- Açığı, belə şeylər olmur. Ramili çox istəyirəm. Bilirəm ki, o da məni çox istəyir. Həqiqətən də onunla münasibətimiz yaxşıdı, bir-birimizə çox yaxınıq. Onun uğurlarına sevinirəm. Əminəm ki, o da mənim uğurlarıma sevinir. Buna görə də bombardirlik haqda fikirləşmirik. İkimiz də komandaya maksimum fayda verməyə çalışırıq.

- Bombardirlik hədəfin yoxdu?
- Var. Amma əsas qollarımızın komandaya xeyir verməsidi. Elə şey ola bilməz ki, Ramil qol vuranda mən sevinməyim, və ya əksinə. Vacib olan komandamızın qələbəsidi. Bu gün hər ikimiz qol vurduq. Birimiz vurmasaydıq, qələbə qazana bilməyəcəkdik.

- İstirahət vaxtı Parisə üz tutmuşdun. Ora getməyinin xüsusi səbəbi var idi?
- Yox. Sadəcə, mənim üçün maraqlı idi. İstəyirdim ki, Parisi görüm.

RƏŞAD