“İmişli” Saatlını doğma stadiona dəyişir
Birinci divizonda 13-cü tura yekun vuruldu. Diqqəti çəkən oyunlardan birində "İmişli" Saatlıda "Sumqayıt-2"ni 3:2 hesabı ilə üstələdi.
Football-plus.az xəbər verir ki, bununla da meydan sahibləri cari mövsümdə 3-cü qələbəsini qazandı.
Qarşılaşma ilə bağlı komandanın baş məşqçisi Ruhid Usubovun fikrini öyrəndik:
"Oyuna yaxşı başladıq. İlk hissə üstünlüyümüz şəraitində keçdi. Uşaqlar əzmkarlıq göstərdi. Nəticədə fasiləyə 3:0 üstün yollandıq. İkinci hissənin gedişində isə futbolçularımda arxayınlıq yarandı, yoxsa rəqib daha istəkli oldu - bunu deyə bilmərəm. Amma zəif çıxış etdik. Nəticədə 2 top buraxdıq. Amma şükürlər olsun, qələbə hesabını qoruduq. Komandamı təbrik edirəm, qələbəyə çox ehtiyacımız vardı. İnanıram ki, davamı gələcək".
Ruhid bəy Heydər Əliyev adına İmişli şəhər stadionunun durumu və gələcək planlar haqda da danışdı:
"Stadionumuzda son tamamlama işləri gedir. Artıq ot örtüyü ilə bağlı problem həllini tapmaq üzrədi. Qismət olsa, 2-ci dövrədə ev oyunlarını doğma meydanda keçirəcəyik. Bu, növbəti matçlarda uğurlu çıxış etmək üçün əsas şərtdi. Bundan başqa, rayonda gənc futbolçuları üzə çıxarmaq üçün seleksiya işləri aparırıq. Uşaq komandalarımızı da bərpa edəcəyik. İndiki əzmkar ruhumuzla, arxamızdakı rəhbərliklə gələcəyə ümidlə baxırıq".
ABDULLA İSMAYILOĞLU
Digər xəbərlər
