Mövsümün ikinci yarısına Antalyada hazırlaşan “Sumqayıt” bu gün “Krılya Sovetov”la qarşılaşıb.

Football-plus.az xəbər verir ki, bu həm də “kimyaçılar”ın toplanış çərçivəsində sonuncu yoxlama görüşü olub. Fasilə dönəmində bəzi futbolçuların “Sumqayıt”ı tərk etdiyini ötən saylarımızın birində nəzərinizə çatdırmışdıq. Bir daha xatırladaq ki, mövsümün ilk yarısını istənilən səviyyədə keçirməyən “gənclik şəhəri” təmsilçisi Damyan Daniçiç, Vüqar Bəybalayev, Rifat Nurmuqamet və Almir Aqanspahiçlə yolları ayırıb. Ondan əvvəl isə Araz Abdullayevlə Ture Oure-Nil Samir Abasovun “qara siyahı”sına düşmüşdü.

Daha iki legioner komandanın Türkiyə toplanışında işirak etmir. Söhbət Rçard Qadze ilə Filipe Çabidən gedir. Kluba yaxın mənbələrdən əldə etdiyimiz məlumata görə, Riçardın anası dünyasını dəyişdiyindən kollektivdən ayrı düşüb. Filipe isə köhnə zədəsini sağaltmaqla məşğuldu. Və bu üzdən vətəni Portuqaliyada qalıb. Ancaq etibarlı mənbədən bizə ötürülən bilgiyə inansaq, adını çəkdiyimiz futbolçular da mövsümün ikinci yarısında “Sumqayıt”ın formasını geyməyəcək. Baş məşqçi onların xidmətinə ehtiyac duymayıb.

RƏŞAD