14 turdan sonra turnir cədvəlinin sonuncu pilləsində qərarlaşan “Sumqayıt”ın məşqçilər korpusu “qara zolaq”dan çıxmağın yollarını axtarır.

Son günlər mətbuatda baş məşqçi Samir Abasovun bəzi oyunçuları cəzalandıraraq əvəzedici heyətə göndərdiyi, komanda üzvlrinin maaşlarının 50 faizini kəsdiyi barədə xəbərlər yayılsa da, “kimyaçılar”ın idman direktoru Faiq Hacı-Məhərrəmov “Football-plus.az” saytına müsahibəsində bunları təkzib etmiş, ancaq belə davam edəcəyi təqdirdə baş məşqçinin qərarına uyğun müxtəlif cəzaların tətbiq olunacağını istisna etməmişdi. İdman direktoru müsahibəsində qış fasiləsində heyətdə dəyişiklər olacağına da işarə vurmuşdu.

Deyəsən, Samir bəy uğursuz nəticələrdən sonra qışı gözləmək fikrincə deyil. Təxminən bir ay öncə Aleksey Baqanın dönəmində heyətə cəlb olunan Oure-Nil Tureni yola salmağı lazım bilən 44 yaşlı mütəxəssis daha futbolçu ilə vidalaşıb. Baş məşqçi bu dəfə Araz Abdullayevin xidmətindən imtina edib. Kluba yaxın mənbələrdən əldə etdiyimiz məlumata görə, Abdullayevin müqaviləsinə qarşılıqlı razılıq əsasında xitam verilib.

RƏŞAD