18-ci turdan sonra futbolçularını istirahətə buraxan “Sumqayıt” dünən 2023-cü ildə ilk məşqinə çıxıb.

Legionerlərin iştirak etmədiyi hazırlıq prosesinə bəzi yerli futbolçular da qatılmayıb. Komandanın məşqçilər korpusundan əldə etdiyimiz məlumata görə, Aydın Bayramovla Elşən Abdullayev xəstə olsuqları üçün məşqə çıxmayıb. Vüsal İsgəndərli isə Türkiyədən dünən döndüyünə görə bu gün komandaya qoşulacaq. Onun kimi Elvin Bədəlovla Murad Xaçayev də bugünkü hazırlıq prosesinə qatılacaq. Yeri gəlmişkən, ilk məşqdə Samir Abasovun da olmadığını qeyd edək. 44 yaşlı mütəxəssis özünü yaxşı hiss etmədiyindən 2023-ün ilk məşqində olmayıb.

Onu da bildirək ki, “kimyaçılar” yanvarın 5-i səhər saatlarında toplanış üçün Türkiyəyə yollanacaq. “Sumqayıt” qardaş ölkədə iki yoxlama matçı keçirməyi planlaşdırır. “Gənclik şəhəri”nin təmsilçisi yanvarın 12-də Macarıstanın yüksək liqasında çıxış edən “Mezököveşd”, 17-də isə Rusiya təmsilçisi “Krılya Sovetov”la üz-üzə gələcək.

RƏŞAD