Emiliano Martines növbəti dəfə diqqəti özünə cəlb edib. Argentina millisinin qapıçısı DÇ-2022-də qazandığı qızıl medalı qorumaq üçün xüsusi təlim görmüş it alıb.

“Daily Star” qəzetinin xəbərinə görə, “Aston Villa”nın oyunçusu Belçika cinsi olan çoban iti üçün 20 min funt sterlinq (təxminən 24 min dollar) ödəyib. Qeyd edək ki, bu heyvanların çəkisi 30 kiloqrama qədər olur. Böyük Britaniya və ABŞ-dakı elit hərbi hissələr onlardan tez-tez döyüş missiyaları üçün istifadə edirlər. “Elite Protection Dogs” şirkətindən alınan it Emilianonun həyat yoldaşı, oğlu və qızının yaşadığı evi qoruyacaq. Maraq üçün “Tottenhem”in və Fransa yığmasının qapıçısı Uqo Lyoris, “Çelsi”nin və İngiltərə yığmasının müdafiəçisi Eşli Koul, həmçinin boksçu Tayson Fürinin bu şirkətin müştəriləri olduğunu da bildirək.