DÇ-2022-yə damğa vuran və təkcə seyvləri ilə yox, həm də birmənalı qarşılanmayan hərəkətləri ilə diqqət mərkəzinə düşən Argentina yığmasının qapıçısı Emiliano Martines klub karyerasında problemlə üzləşib.

Bilindiyi kimi, Argentinanın dünya çempionu olmasında böyük rol oynayan təcrübəli qapıçı “Qızıl əlcək” mükafatı alaraq turnirin ən yaxşı qapıçısı seçilmişdi. Amma Martines mükafatı alandan sonra onu cinsi orqanına yaxınlaşdıraraq fransalı fanatlara qarşı nalayiq hərəkət etmişdi. Eləcə də Buenos-Ayresdə qələbəni qeyd edərkən onun əlindəki kukla diqqəti çəkmişdi. Həmin kuklanın üzünə Kilian Mbappenin ağlayan şəkli yapışdırılmışdı. Sonra isə argentinalı fanatlar həmin kuklanı kağızdan düzəldilmiş qəbirə ataraq yandırmışdılar. Bu hadisə Fransada narazılıq doğurmuş və bir çox sabiq fransalı futbolçu Martinesə etirazını bildirmişdi. Bu arada məlum olub ki, bu qapıçının şərəfini qoruduğu “Aston Villa”nın baş məşqçisi Unay Emeri də onun hərəkətlərindən narazıdı. Təcrübəli mütəxəssis bir müddət öncə bildirmişdi ki, belə hərəkətlərə yol vermək düzgün deyil və bu üzdən Martineslə ciddi söhbət etməyi planlaşdırır. Görünür, onlar arasında artıq söhbət baş tutub və böyük ehtimalla 30 yaşlı qapıçı klubunu dəyişməli olacaq. “Aston Villa” Martinesi satmağa və ona görə gələcək istənilən təklifi nəzərdən keçirməyə hazırdı. Emeri onun yerinə komandasında son mundialı yaxşı keçirən daha bir qapıçını – Mərakeş yığmasının və “Sevilya”nın üzvü Yasin Bununu görmək istəyir. Martines artıq “Aston Villa”nın düşərgəsinə qayıtsa da, dekabrın 26-da “Liverpul”a qarşı premyer-liqa matçında onun adı heç iştirak ərizəsinə də düşmədi! Emeri ilə Martines bir-birini hələ “Arsenal”dan gözəl tanıyır. İspaniyalı mütəxəssis 2018-in mayından 2019-un noyabrına qədər “Arsenal”ı çalışdırdığı müddətdə Martines də komandada idi. O vaxt argentinalı heç cür Emeriyə özünü yaxşı tərəfdən göstərə bilməmiş və əsas qapıçı statusunu almaniyalı Bernd Leno daşımışdı. Deyilənə görə, bu ikilinin münasibətləri o vaxtdan pozulub. Çünki həmin dönəmdə onlar arasında bir neçə dəfə mübahisə yaşanıb. Martines İngiltərəni tərk etmək istəmədiyindən, çox güman, premyer-liqanın başqa klubuna yollanacaq.