Türkiyə çempionatında dünən 2-ci tura start verildi.

"Football-plus.az" xəbər verir ki, turun açılış oyununda ''Trabzonspor'' ''Hatayspor''u qəbul etdi. Son çempion çətinliklə də olsa, minimal hesabla qalib gəlməyi bacardı.

Yeganə qolu görüşün 71-ci dəqiqəsində Abdülkadir Ömür vurdu. Bununla da ''Trabzonspor'' mövsümə ardıcıl 2 qələbə ilə başlamış oldu. Özü də hər iki oyunda komanda qapısını toxunulmaz saxlayıb.

Trabzonluların sonuncu dəfə ilk iki turda qol buraxmadan qalib gəlməsinə 35 il öncə - 1987/88 mövsümündə rast gəlinmişdi. Klubun başında 80-ci rəsmi oyunda 50-ci qələbəsini qazanan Abdulla Avcı adını qaradənizlilərin tarixinə yazdırdı. Belə ki, indiyə qədər klubun tarixində ardıcıl 2 mövsümə 2 qələbə ilə start verən məşqçi olmamışdı! Onu da bildirək ki, komandanın aparıcı oyunçularından olan Edin Visça bu görüşdə şanssız şəkildə zədələnib. Qolu qırılan və stadiondan birbaşa xəstəxanaya çatdırılan bosniyalı vinger ən azı 3-4 aylığa sıradan çıxıb.