Liberiya millisinin üzvü Azərbaycan klubunun hədəfində

Liberiya millisinin daha bir üzvü karyerasını Azərbaycanda davam etdirə bilər.

Söhbət müdafiəçi Prins Baldedən gedir. Hazırda klubsuz olan futbolçu ilə premyer-liqa təmsilçilərindən biri danışıq aparır. 24 yaşlı futbolçu son olaraq Kosovoda çıxış edib. Daha dəqiq desək, “Drita”da. Balde 2022/23 mövsümündə cəmi 8 görüşdə meydana çıxıb. Bu qarşılaşmalarda 1 qol vurub, 1 sarı vərəqə alıb. Futbolçu yanvarın əvvəllərində qarşılıqlı razılıq əsasında “Drita” ilə yolları ayırıb.

Balde peşəkar karyerasına ölkəsində başlayıb. Burda “Çampasak Yunayted”də top qovub. Daha sonra “Monrovii”yə keçib. 2018-ci ildən isə Kosovo karyerası başlayıb. O, ardıcıl olaraq “Feronikeli”, “Dreniça” klublarında çıxış edib. Liberiya millisində 10 matçda meydana çıxsa da, fərqlənə bilməyib.

İLKİN SULTANLI