Yaşar Vahabzadə, Aleksey Baqa və Mahmud Qurbanov... Birinci uğursuzluqlar fonunda "Kəpəz" azarkeşlərinin artan təzyiqinə dözmədi.

İkinci "Sumqayıt"ın "qəddini düzəldə" bilməyib Belarusa qayıtmaq məcburiyyətində qaldı. Üçüncü isə...

Mahmud Qurbanovun "Səbail"dən ayrılacağını komandanın ən pessimist azarkeşi belə gözləmirdi. Bir sadə məntiqlə ki, "professor" da, klub rəhbərliyi də qarşılıqlı sevgi şərqiləri oxuyurdu. Mətbuatda davamlı tirajlanan istefa xəbərlərini qətiyyətlə rədd edirdilər. Komandanın "Sabah" kimi iddialı rəqibini kubokda mübarizədən kənarlaşdırmaqla yarımfinala adlaması da onların mövqeyini gücləndirmişdi. Adamlar qış fasiləsinin planlarını cızır, ikinci yarıda əsas hədəfin turnir cədvəlinin "zirzəmi"sindən qurtulmaq olduğunu el-aləmə bəyan edirdi. Amma...

Yeni ilə sayılı günlər qalmış Mahmud Qurbanovun istefa xəbəri yayıldı. Öz xoşu, istəyi ilə. Dünənə kimi bu cür xəbərləri qətiyyətlə təkzib edən, ikinci yarının planlarını cızan biri niyə ayrılmaq qərarı versin ki? "Professor" öz istəyi ilə ayrıldığını açıqladı, klub rəhbərliyi də bunu təsdiqlədi. Amma kluba yaxın mənbədən əldə etdiyimiz məlumata görə, məsələ heç də ictimaiyyətə təqdim olunan kimi sadə deyilmiş. Mahmud Qurbanovdan avrokuboka vəsiqə qazanmaq tələb olunub. Üstəlik, transfer məsələlərində fikir ayrılığı yaranıb. "Professor" da bu üzdən "siz sağ, mən salamat" deyib.

Möhkəm tellərlə AFFA-ya bağlı olan klub yeni baş məşqçi axtarışına çox vaxt ayırmadı. "Boz bina"nın otaqlarından birinə boylanmaq kifayət etdi. Məşqçilər Komitəsinin üzvü Şahin Diniyev artıq bir neçə gündü "Səbail"in baş məşqçisidi. Təcrübəli mütəxəssis qollarını çırmalayaraq işə başlayıb. Hədəflərə gəlincə...

Dəyərli dostlar, bax, "xoruzun quyruğu" bu yerdə görünür. Şahin bəy "Futbol+"ə açıqlamasında qarşısına avrokuboka vəsiqə qazanmaq hədəfi qoyulmadığını deyib. Onu da əlavə edib ki, hazırkı heyətlə bu missiyanın öhdəsindən gəlmək real deyil. Turnir cədvəlində mümkün olduğu qədər irəliləməyə çalışacaqlar. Burdan isə belə qənaətə gəlmək olar ki, kimsə bu məsələdə səmimi deyil, yalan danışır. Özünü "aydan arı, sudan duru" göstərmək istəyir. İmanımı yandırıb kimisə suçlamaq istəməzdim. Fal açmağa da ehtiyac görmürəm. İnşallah, əlahəzrət zaman hər şeyi gün işığına çıxaracaq. Bizə gözləmək qalır...

KƏNAN HƏSƏNOV