2023-cü ilin elə ilk günlərində Azərbaycan futbolu tarixində ilkə imza atılacaq.

Uzatmağa gərək yoxdu. Qarabağ"ın futbolçusu Kadi Borges "Krasnodar"a keçir. Rusiya klubu 5 milyon avro ödəməklə futbolçunu “rənglərinə bağlayacaq”. Bu, Azərbaycan futbol tarixinin ən yüksək məbləğli transferidi. Braziliyalı hazırda ölkəsində istirahətdədi. Lakin tezliklə Rusiyaya yollanacaq. O, artıq "Krasnodar"la müqaviləsinin bütün detallarını razılaşdırıb. Qonşu ölkə təmsilçisi Ağdam klubuna 5 milyon avro ödəyəcək.

Ruslar Kadinin keçidini tezləşdirmək istəyir. Belə ki, komanda yanvarın 2-də təlim-məşq toplanışına start verəcək. Həmin gün futbolçu tibbi müayinədən keçəcək. Hər şey qaydasında olsa, onunla ikiillik müqavilə bağlanacaq. Kadi "Krasnodar"da "Qarabağ"dakından iki dəfə artıq maaşa oynayacaq. Onun gedişini şərtləndirən əsas səbəblərdən biri də məhz budu. Bundan başqa, braziliyalı Rusiya çempionatındakı rəqabəti də nəzərə alaraq belə seçim edib.
Redaksiyamıza Kadi ilə bağlı maraqlı informasiya daxil olub. Sən demə, yayda Avropanın bəzi klubları yarımmüdafiəçini transfer etmək istəyib. Lakin "Qarabağ" onu satmağa razı olmayıb. Bundan sonra braziliyalı ilə yeni müqavilə bağlanıb. Bu zaman təkliflər çox olmasın deyə, müqaviləyə "5 milyon avro verilsə, sərbəst qalacaq" bəndi salınıb. Rəhbərlik həmin vaxt bu pulu heç kimin ödəməyəcəyini düşünüb. Daha sonra Kadinin "Qarabağ"da özünü daha yaxşı göstərməsi "Krasnodar"ın diqqətini çəkib. Ruslar əvvəlcə ağdamlılara 2 milyon təklif edib. "Köhlən atlar" bundan imtina edib. "Krasnodar" rəsmiləri daha sonra ardıcıl olaraq 3, 4 milyon təklif edib. Lakin ağdamlılar bununla da razılaşmayıb. Nəhayət, ruslar sonda Kadinin müqaviləsində qeyd olunan bənddən istifadə etmək qərarına gəlib. Yəni onu “Qarabağ”dan 5 milyon avroya qoparmaq mümkün olub.

İLKİN SULTANLI