"Futbol yalnız idman növü yox, həm də biznesdi. Odu ki, hansısa klubun futbolçusuna daha imkanlı komandadan cəlbedici təklifin gəlməsi və ora transfer olunması normaldı. Top-liqalarda tez-tez belə halları görürük. Odu ki, Kadinin başqa kluba keçidini faciəyə çevirmək lazım deyil. Hərçənd braziliyalının başqa kluba keçəcəyi ilə bağlı ortada fakt yoxdu. Çoxları düşünür ki, Kadi "Qarabağ"dan getsə, komanda üçün ciddi itki olacaq. Bu doğru yanaşma deyil. Əvvəla ona görə ki, "Qarabağ" bir futbolçu üzərində qurulan komanda deyil. İkincisi, heç kim əminliklə deyə bilməz ki, “sambaçı” qalsa, “Qarabağ” "Gent" səddini rahat keçəcək və ya asanlıqla ölkə çempionluğunu təmin edəcək. Təbii, Kadinin klubu tərk etməsinin təsiri olacaq. Amma böyük miqyasda yox. Peşəkar klub yalnız çıxışıyla yox, həm də futbolçu transferiylə uğur qazanmalıdı. Kaddiyə görə "Qarabağ"a 5 milyon avro təzminat ödənilərsə, bu futbolumuzda bir ilk olacaq. Bununla bəlli olacaq ki, Azərbaycan premyer-liqasından da güclü çempionatlara futbolçu ixrac olunur. 5 milyona Kadi və ondan səviyyəli futbolçular tapmaq da olar, tapmamaq da. Bunu hadisələrin axarı göstərəcək. Səviyyəli legioner cəlb etmək üçün yalnız milyonlarla vəsait kifayət deyil. Ölkə çempionatının səviyyəsindən də çox şey asılıdı. Nə qədər acı olsa da, səviyyəli əcnəbi futbolçuların çoxu Azərbaycan çempionatının zəifliyini əsas gətirərək ölkəmizə gəlmək istəmir. Odu ki, yaxşı futbolçular yaxşı liqalara üz tutmaqda maraqlıdı".