Mövsümün əvvəlindən Azərbaycan futbol ictimaiyyəti “Kəpəz”lə “Turan Tovuz” üçün səfərbər olub.

AFFA tərəfindən yaradılan Futbolun İnkişaf Fondunun təşkilatçılığı ilə piksellər satışa çıxarılıb. Həmin pikselləri almaqla azarkeşlər qərb təmsilçilərinə dəstək vermək, klublar üçün avtobus alınmasında pay sahibi olmaq şansı qazanırdılar. İl başa çatdı, mövsüm yarılandı. Nə qədər piksel satılmasından, ortada nə qədər pul olmasından xəbərsizik. Amma dəqiq olan bir şey var ki, ortada avtobus yoxdu. Nə “Turan Tovuz”un avtobusu var, nə də “Kəpəz”in. Hətta iki klub üçün satılan piksellərin pulunu toplasaq belə, ortaya 100 min manat çıxarmaq, bir normal avtobus almaq mümkün olmaz. Sözsüz, xeyli acınacaqlı vəziyyətdi. Üz-üzə qaldığımız bu acınacaqlı vəziyyət həm də acı reallıqdı. Biz bu reallıqdan qaça bilmərik.

Məlum məsələdi ki, “Kəpəz”lə “Turan Tovuz”a ayrılan büdcə məhduddu. Həmin o büdcədən klublar üçün yeni avtobusun alınması nəzərdə tutulmayıb. Görünən odu ki, AFFA-nın arzuladığı baş tutmadı, Tovuzla Gəncənin icra hakimiyyətləri futbol klublarına yetərincə maliyyə ayırmaq istəmədilər. Yaxud da buna gücləri çatmadı. Sözüm onda deyil. Heç yerli iş adamları da FİF-in çağırışlarına səs vermədi, “Kəpəz”ə və “Turan Tovuz”a görə xərcə düşmək istəyən biznesmen tapılmadı. Şəxsən mənim üçün təəccüblü də deyil. AFFA illər ərzində Azərbaycan futbolu üzərində elə bir qorxunc inhisar yaradıb ki, pulunun qədrini bilən heç bir iş adamı “boz bina”dan gələn çağırışa səs vermək istəmir. Belədə əsas ümid də AFFA-dan, deməli, həm də dövlətdən və premyer-liqaya sponsorluq edən “Misli”dən gələn pula qalıb, elitanın kasıb təmsilçiləri gözlərini bir nöqtəyə dikiblər.

Əlbəttə, indiki halda “Kəpəz”lə “Turan Tovuz”u gələcəkdə nə gözlədiyini demək çətindi. Əvvəla ona görə ki, AFFA artıq neçə dəfə bu mövsüm premyer-liqanın sonuncusunun elitanı tərk edəcəyini bildirib. Düzdü, “Turan Tovuz”un belə bir qorxusu yoxdu. Ayxan Abbasovun çalışdırdığı komanda pis-yaxşı nəticələr qazanır, xal ehtiyatını artırır. Tovuzluların mövsümün sonunda “zirzəmi”yə yuvarlanması üçün xeyli qəribə hadisələr baş verməlidi. Amma “Kəpəz”lə bağlı eyni arxayınlıqla danışmaq olmur. Çünki Gəncə təmsilçisi son pillədəki “Səbail”i cəmi 2 xal qabaqlayır. Özü də “Kəpəz”in ətrafında qəribə hadisələr cərayan edir, komanda qeyri-sabit oynayır. Bir də gördük ki, “Kəpəz” məğlubiyyətləri sıraladı və son pilləyə yuvarlandı. Hər halda, belə ehtimal olmamış deyil. Görünür, bütün bunları nəzərə alan klub başbilənləri özlərini artıq xərcə salmaq istəmirlər. Bir ətək pul töküb, bahalı avtobus aldılar. Gələn il də qərb təmsilçilərindən hansısa aşağı yuvarlandı, onda avtobusu nə edəcəklər?

Amma öz aramızdı, “Turan Tovuz”la “Kəpəz” mövsüm ərzində futbolçuların aqressiv davranışları, azarkeşlərinin hakimlərə və rəsmi şəxslərə atmacaları, meydana kənar şəxslərin daxil olması sayəsində bir avtobusun pulu qədər cərimələnib. Sanki AFFA özü xərclədiyi pulu bu şəkildə geri qaytarır. Çox da uzaq keçmişə boylanmaq istəmirəm. Noyabrın 13-də, 14-cü tur çərçivəsində keçirilən “Kəpəz” – “Turan Tovuz” qarşılaşmasından sonra qərb təmsilçilərinin hər biri 1600 manat cərimə edilmişdi. AFFA bu cəriməni meydana kənar şəxslərin daxil olması ilə əsaslandırmışdı. Ölkə kubokunun 1/4 final mərhələsinin cavab qarşılaşması bu komandaları daha çox xərcə saldı. Tovuzlular bu dəfə də meydana kənar şəxslərin daxil olmasına görə 1600 manat ödəməli olacaq. Meydana kənar əşyaların atılmasına görə kəsilən cərimə də 1600 manatdı. Pirotexniki vasitələrdən istifadəyə görə də “Turan Tovuz” 800 manat ödəməlidi. Hələ xırda-xuruş cərimələri demirəm. Bu üç maddəyə görə tovuzlular 4000 manat cərimə ödəməli olacaq. “Kəpəz” də eyni məbləği azarkeşləri tərəfindən oyunun rəsmi şəxslərinin ünvanına təhqiramiz ifadələrin işlənməsinə görə AFFA-nın büdcəsinə köçürməlidi.
Gördündüyü kimi, ortada yetərincə ciddi məbləğlər “fırlanır”. Özü də başına gələn başmaqçı olsa da, “Turan Tovuz”la “Kəpəz” dərs çıxarmaq həvəsində deyil. İlin son oyununda “Kəpəz”in üç futbolçusu qırmızı vərəqəylə cəzalanıb. Sözsüz, buna görə də AFFA Gəncə təmsilçisinin başına sığal çəkməyəcək. Beləcə hər dəfə təkrarlanan bu cür davranışlara görə klubların onsuz da məhdud olan büdcəsinə əlavə yük düşür. Halbuki həmin pulları büdcədə saxlamaq, kluba avtobus almaq mümkün idi. Dama-dama avtobus ola bilərdi, dostlar. Amma həmin pullar cərimələrin ödənməsinə gedir. Budu sizin peşəkarlığınız, “Kəpəz”lə “Turan Tovuz”a verdiyiniz dəyər?!

AMAL