Türkiyə Futbol Federasiyası ciddi dəyişikliklərin astanasındadı.

Qurumun sədri Mehmet Büyükekşi daha öncə verdiyi açıqlamalarda federasiyada dəyişikliklər etmək istədiyinə işarə vurmuşdu. Bu prosesə artıq start verilib.

Qeyd edək ki, Büyükekşi vəzifəyə gəldikdən sonra bir araşdırma şirkəti ilə anlaşmışdı. Şirkət federasiyada çalışan 500-ə yaxın işçinin hər birinin fəaliyyətini incələyərək Büyükekşiyə raport vermişdi. Prezidenti belə addım atmağa vadar edən məqam federasiyada bir çox işçinin yaşının 70-80 arası olması, eləcə də onların quruma ciddi bir faydasının dəyməməsi idi. Araşdırma şirkətinin raportundan sonra bəlli olmuşdu ki, bu adamlardan bəziləri, ümümiyyətlə, iş yerinə gəlmir. Onlar bank və başqa sahələrdə çalışdıqları halda federasiyadan da maaş almaqda davam edirmişlər. Dəyişikliyin ilk qurbanı TFF prezidentinin baş məsləhətçisi vəzifəsini icra edən Hilmi Gökçınar oldu. 2017-dən bu vəzifədə çalışan, eləcə də ''Ankaraspor''un sabiq prezidenti və Klublar Birliyinin sabiq vitse-prezidenti olan Gökçınar Büyükekşi ilə keçirdiyi görüşdən sonra istefa verdiyini açıqladı. Dünən isə aralarında müxtəlif bölgə müdirlərinin olduğu daha 25 nəfərlə yollar ayrıldı! Onların arasında TFF-də baza və yatırıma nəzarət üzrə müdür köməkçisi İbrahim Domaç, bölgələr üzrə əlaqələndirici Hasan Gənçoğlu, İzmir Bölgə Müdirü Hamdi Kutval, Antalya Bölgə Müdirü Ahmet Köksalan, Lisenziya Komitəsinin üzvü Emren Karakullukçu da var. Türkiyə mətbuatının yazdığına inansaq, TFF sədri 500-ə yaxın işçidən təxminən 100-nü vəzifəsindən azad etməyi planlaşdırır!

İndi isə keçək Türkiyə futbol ictimaiyyətinə gözəl tanış olan simalara. ''Altyapı'' direktoru və U-21 yığmasının baş məşqçisi Tolunay Kafkasla bağlı da qərar verilib. Həm oyunçu seçimlərinə, həm də nəticələrə görə futbol ictimaiyyəti tərəfindən ciddi tənqid atəşinə tutulan Kafkasın oktyabrın 15-də bitəcək müqaviləsi yenilənməyəcək! Bu haqda Kafkasın özünə də məlumat verilib. U-21 yığmasının başına kimin gətiriləcəyi bəlli olmasa da, ''altyapı'' direktoru vəzifəsi böyük ehtimalla Oğuz Çətinə tapşırılacaq. Çətin TFF-də 2019-dan bəri Futbol İnkişaf direktoru vəzifəsini icra edirdi. Çətinin köməkçisi olan Rüştü Rəcbərlə isə yollar ayrılacaq. Türkiyə mətbuatının yazdığına inansaq, ''Fənərbaxça'', ''Beşiktaş'' və ''Barselona''nın sabiq qapıçısı olan Rəcbər bu ayrılıqdan sonra Türkiyə ilə birdəfəlik vidalaşaraq Londona köçəcək. Futbolsevərləri ən çox maraqlandıran məsələ isə Türkiyə yığmasında bir dəyişikliyin olub-olmayacağıdı. Son nəticələrin ardından ''kreslosu laxlayan” Ştefan Kuntsu hələ ki heç kim istefaya göndərməyə tələsmir. Eləcə də federasiyada yığma komandaya cavabdeh yönətici kimi çalışan Həmit Altıntop da vəzifəsindədi. Amma Mehmet Büyükekşinin bir neçə gün öncə öz ofisində təcrübəli mütəxəssis Samet Aybaba ilə görüşməsi diqqəti çəkib və böyük suallar doğurub. Şayiələrə inansaq, onlar Türkiyə yığmasının gələcəyini müzakirə ediblər. Bir ildən artıqdı heç bir klubu çalışdırmayan 66 yaşlı Aybabanın birdən-birə yığmanın başına gətiriləcəyi inandırıcı görünmür. Amma ona yığmanın əlaqələndiricisi vəzifəsinin verilməsi yetərincə inandırıcı səslənir. Buna Həmit Altıntopun reaksiyasının necə olacağı da maraq doğurur.