Mahmud Qurbanov: "Hərdən elə gəlir ki, kənardan bəzi şəxslər "Səbail"ə bizdən çox canfəşanlıq edir"
Azərbaycan kubokunun 1/4 finalının cavab görüşlərinə start verilib.
"Səbail" "Sabah"ı minimal hesabla məğlub edib. Oyundan sonra "dənizçilər"in çalışdırıcısı Mahmud Qurbanovun mətbuat konfransı keçirilib. Sizi mütəxəssisin fikirləri ilə tanış edirik:
"Kubok oyunları hər zaman fərqli olur. Bu gün bunun şahidi olduq. Kubokda komandamız çox yaxşı təsir bağışlayır. 3 oyunda da qələbə qazanmışıq. Bu gün də güclü rəqibi mübarizədən kənarlaşdırdıq. Futbolçulara təşəkkür edirəm, belə davam etmək lazımdı. Qarşıdakı matçlarda da qələbə üçün çalışacağıq. Klub tarixində ilk dəfə yarımfinala yüksəldik".
- Əvəzetmə etmədiz, buna məcbur olduz, ya ehtiyac görmədiz?
- Ehtiyac duymadım. Cabir Əmirlinin ağrıları var idi, buna baxmayaraq sona qədər oynadı.
- Oyundan əvvəl komanda haqda müxtəlif iddialar səslənirdi. Sizin göndəriləcəyiniz, komandaya yemək verilmədiyi kimi fikirlər var idi...
- Bu gün məni də oyundan sonra göndərirdilər. Mənim üçün də maraqlıdı bu xəbərlər. Hər oyundan sonra məni göndərib, yeni baş məşqçi gətirirlər. Hərdən elə gəlir ki, kənardan bəzi şəxslər "Səbail"ə bizdən çox canfəşanlıq edir, bəzi şeyləri qabardırlar. Məlumatları oxuyuram və qəribə gəlir ki, həqiqətən belə şeylər olur? Bəzi insan narahatdılar. Biz öz işimizə baxırıq.
Digər xəbərlər
