Azərbaycan kubokunda 1/4 final mərhələsinin cavab oyunlarına start verilib.

"Qəbələ" "Qarabağ"ı üstələyib - 1:0. Matçdan sonra ağdamlıların çalışdırıcısı Qurban Qurbanovun mətbuat konfransı keçirilib. Sizi mütəxəssisin fikirləri ilə tanış edirik:

- Sanki "Qarabağ" kuboka yaxşı motivasiya olmamışdı. Bu haqda nə deyə bilərsiz?
- Xeyr. Mən həmişə demişəm ki, kubok başqa prestijdi. Çalışırıq ki, bu turnirdə oyun təcrübəsi daha az olan futbolçulardan istifadə edək. Neçə illərdi bu, pis alınmır. Komandada ilin sonuna yaxın fiziki və psixoloji yorğunluq ola bilir. Həddən çix texniki səhvlərimiz olurdu. Orqanizm yorğun olanda düşüncə qabiliyyəti aşağı düşür. Bunun canlı şahidi olduq. Amma biz kuboka ciddi yanaşırıq. Çalışırıq ki, hər il kuboku başımız üzərinə qaldıraq. Bunun ləzzəti başqadı.

- Mövsüm ərzində daxili yarışlarda ilk məğlubiyyətinizi aldınız. Bu, komandaya psixoloji olaraq necə təsir göstərəcək?
- Hər məğlubiyyətdə həmişə gələcək üçün fayda görmüşəm. Bəzən futbolçular daha ciddi olmaq üçün məğlubiyyəti hiss etməlidilər. Bunun köməyi ola bilər. Həmişə qalibiyyətlə olanda futbolçularda arxayınlıq yaranır. Həmişə məğlubiyyət arzulamıram (gülür). Amma arada belə məğlubiyyətlərin faydası çox olur.

- Azərbaycanda məğlubiyyətsiz çempion olan yeganə komanda "Kəpəz"di. Sizin belə bir hədəfiniz var?
- Belə bir düşüncəmiz yoxdu. Heç bir oyunda uduzmaq istəmirəm. Futbolçulardan tələbimiz budu. Çempionluğa oynayırsansa, hər matça qalibiyyət üçün çıxmalısan. Məğlubiyyətimiz olmasa, çox sevinərik.

- Musa Qurbanlının Polşa klubuna keçidi nə dərəcədə realdı?
- Hazırda real deyil. Bildiyim qədər maraqlanıblar. Amma bir məşqçi olaraq hələ ki, getməyinin tərəfdarı deyiləm.