Premyer-liqanın 17-ci turunda "Şamaxı" "Zirə" ilə heç-heçə edib - 0:0.

Football-plus.az xəbər verir ki, oyundan sonra qonaqların baş məşqçisi Vüqar Əsgərli mətbuat konfransında qarşılaşma haqda fikirlərini səsləndirib:

“Zirə” topa sahib olmada möhtəşəmdi. Ağır oyun olacağını bilirdik. Futbolçularımız legionerlərlə eyni səviyyədədilər. O səviyyəyə çatıblar. Bu, hər şey demək deyil. Amma bu oyunlar gözlənilən idi. İlk turlarda istədiyimiz nəticələr alınmırdı. Amma ümidli idik. Bir neçə turdur, xallar qazanırıq. Sevinirik. “Zirə”yə uğurlar arzulayıram. Futbolçularıma təşəkkür edirəm. Əziyyət çəkirlər. Ehtiyat oyunçularımız azdı. Əlimizdə olanlarla davam etməyə, hazırlaşmağa çalışırıq".

- İlk hissədə komandanız daha çox qol epizodu yaratdı. Amma qol vura bilmədiz. Bu, həyəcan, yoxsa təcrübə ilə bağlıdı?
- Həyəcan deyil. Oyundan oyuna təcrübə də qazanırlar. “Zirə”nin təcrübəli müdafiəçiləri var. Həyəcan yox idi. Oyunçuları kökləyəndə izah edirik ki, itirəcəyimiz heç nəy yoxdu. Əsas potensialı ortaya qoymaqdı.

- 6 matçdı, məğlub olmursuz, qarşıdan isə “Neftçi” ilə səfər oyunu gəlir...
- Hər oyuna eyni hazırlaşırıq, eyni köklənirik. “Neftçi” möhtəşəm komandadı. Səfərdə çətin oyun olacaq. Uğurlu seriyanın davam edəcəyinə inanırıq.

- Transfer çalışmalarınız davam edir?
- Danışıqlar gedir. Ad çəkmək istəmirik. Gənc oyunçularla danışıq aparırıq. Limit dolub deyə icarəyə götürə bilmirik. Ona görə də çalışacağıq ki, birbaşa transfer edək.

- “Şamaxı”nı ikinci dövrənin komandası adlandırmaq olar?
- Buna həm sevinirəm, həm kədərlənirəm. Əvvəldə də baxımlı oynayırdıq. Biz görürdük ki, nəticəyə çata bilərik. İkinci dövrənin ən yaxşısı olduğumuzu deyə bilərəm.

- Rəşad Sadıqov Cavid Hüseynovu təbrik etdi. Amma baş məşqçi sizsiz...
- Hər dəfə demişik ki, iki baş məşqçimiz var. İkisini də deyəsi deyil. Bizim üçün fərqi yoxdu.

- Bu, sizdə qıcıq yaratmır?
- Xeyr, qıcıq yaratmır. Nəticələrimizdə bütün məşqçilər heyətinin, personalın əməyi var.