Yenidən formalaşdırılan "Şamaxı" mövsümə uğursuz başlamaqla turnir cədvəlinin dibinə yuvarlandı.

Lakin son 4 oyunda "aslanlar" 2 qələbə, 2 heç-heçə ilə 7-ci yerə yüksəldi. Komandanın uğurunda pay sahibi olanlardan biri də Kamran Quliyevdi. 22 yaşlı futbolçu ilə "Şamaxı"nın 16 tur ərzindəki çıxışı, öz performansı və başqa mövzular ətrafında söhbət etdik.

- “Şamaxı” mövsümə yaxşı başlamasa da, son matçlarda uduzmur, hətta güclü komandaları da büdrədir. Oyundakı və nəticələrdəki inkişaf nəyin sayəsində baş verdi?
- Yenidən qurulan komandayıq, demək olar, bütün oyunçularımız cari mövsümdən peşəkar karyerasına qədəm qoyub. Odu ki, ilk vaxtlar təcrübəsizlik rol oynadı. Amma tədricən bu problemi aradan qaldırdıq, müəyyən inkişafa nail olduq. Həmçinin artıq futbolçular meydanda bir-birini tamamlayır, yaxşı anlaşırıq.

- Komandanın əsas hücumçusu Amil Yunanov sıradan çıxdığından bu yükü sən üzərinə götürmüsən. Çətin deyil?
- Amil Yunanov klubumuz üçün önəmli futbolcudu. Artıq məşqlərə qoşulub ki, bu da bizi sevindirir. Xeyr, heç bir çətinlik olmur, həm də mənimlə yanaşı, Rövşən Şahmuradovla Qurban Səfərov da həmin mövqedə oynaya bilir.

- Necə düşünürsən, qışda yeni hücumçu cəlb olunması komandaya fayda verər?
- Komandamız nə qədər güclü olsa, bir o qədər yaxşıdı. Lakin mən transfer işləriylə məşğul olmuram. Rəhbərlik və məşqçilər nə qərar versə, o da olacaq. Bir də onu deyim ki, kim gəlir-gəlsin, rəqabət aparmağa hazıram. Çünki bu, inkişafımda önəmli rol oynayar.

- Hazırkı çıxışından razısan?
- Tam formada deyiləm. Daha da “artırmalıyam”. İnşallah, üzərimdə işləyib daha yaxşı formada olacağıma inanıram.

- Bir neçə qol və məhsuldar ötürmə ilə yadda qalmısan. Bombardirlər yarışına qoşulmağı düşünürsən?
- Bacardığım qədər cox qol vurmağı və bombardirlər siyahısında olmağı düşünürəm.

- Hazırkı çıxışıyla "Şamaxı" nəyə ümid edə bilər?
- Oyundan-oyuna “artırmağa” calışırıq. Amma hələ heç nə etməmişik. Yəni eyforiyaya qapılsaq, bizim üçün çox çətin olacaq.

- "Sabah"la son oyunda rəqibin futbolçusu Kristian Sebalyosla qarşıdurma yaşandı və o sənə zərbə endirdi. Söhbət necə bu həddə çatdı?
- Əvvəla onu deyim ki, Sebalyosla heç bir problemim yoxdu. "Sabah"da çıxış edərkən onunla normal münasibətimiz olub. Elə oyundan öncə də görüşüb söhbətləşmişdik. Matçdakı ilk künc zərbəsi zamanı məni itələsə də, yıxılmadım. İkinci epizod zamanı yenə itələdi. Həmin an əlimi kənara açaraq “Sebalyos, mənimlə problemin nədi”, - deyə soruşdum. O da üzümə zərbə endirdi. İki variantım var idi: ya qarşılığında onu vurub qırmızı vərəqə almalı, ya da yerə yıxılaraq rəqibi azlıqda qoymalıydım. Mən də ikincini secdim. Çünki hazırkı klubum "Şamaxı" üçün əlimdən gələni etməyə hazıram.

- "Sabah" premyer-liqanın iki güclü komandasından biridi. Ona qarşı oyunda çoxlarının gözləmədiyi halda əzmkarlıq göstərərək 1 xal qazandız. Matçla bağlı fikirlərin maraqlıdı.
- Öz potensialımızı bilirik və bu bizim maksimumuz deyil. Təbii ki, "Sabah" kimi komanda ilə oyundan 1 xalla ayrılmaq qızıla bərabərdi. Həmin oyunda qalib gələ də, məğlub da ola bilərdik.

- Komandanızın “sükanı arxasında” Cavid Hüseynovla Vüqar Əsgərli kimi gənc məşqçilər dayanır. Onları necə xarakterizə edərdin?
- Çox istəkli məşqçilərdi. Komandamızdakı gənc futbolçular kimi, onlar da məşqçi kimi ilk təcrübə qazanırlar. Hər ikisi futbolçularla həm meydanda, həm də ondan kənarda yaxşı münasibət qururlar. Çox qayğıkeşdilər.

- Mövsümün sonunda "Şamaxı"nı tərk edib daha iddialı komandalara keçmək və ya legioner həyatı yaşamaq barədə düşünürsən?
- Müqavilə ilə "Sabah"a məxsusam. "Şamaxı"da mövsümün sonuna kimi icarədəyəm. Hazırda bütün fikrim burda daha yaxşı çıxış etməklə komandaya dəstək verməkdi. Mövsümün sonunda "Sabah"a qayıdacam, karyeramla bağlı sonrakı proseslərin necə olacağını zaman göstərəcək.

- "Sabah" bu mövsüm çox iddialıdı. İki oyunda "Neftçi"ni məğlub edib, çempionatın aşkar favoriti "Qarabağ"a “diş göstərib”. Səncə, komandanın çempionluq şansı var?
- "Sabah"ın çempion olması mənim də ürəyimdən keçir, amma çox çətin olacaq. Çünki "Qarabağ" olduqca güclüdü. Fikrimcə, "Sabah" 2-ci yerdə möhkəmlənmək və bacardıqca liderə çatmaq üçün vuruşacaq. Amma “Qarabağ” da əvvəlki mövsümlərdəki kimi rahat cempion ola bilməyəcək. Bütün komandalar ağdamlılara qarşı xüsusi motivasiya ilə oynayır. Yəni onlardan 1 xal qoparmaq elə qələbəyə bərabərdi. Bundan başqa, çempionatda çıxış edən komandaların sayı artmaqla yanaşı, oyun fəlsəfəsi də yüksəlib. Çempionatın qarşıda hələ iki turu və ikinci yarısı var. Odu ki, indidən "Qarabağ"ın çempion olacağını demək düz deyil.

- Yığmamızın son oyunları barədə nə deyə bilərsən? Ölkənin əsas komandasından dəvət gözləyirsən?
- Millimiz son 5 oyunda əla nəticələr göstərib. Bir azərbaycanlı kimi bu məni sevindirir. Əlbəttə, nə vaxtsa millidə çıxış edəcəyimə inanıram və dəvət gözləyirəm.

- Dünya çempionatında hansı komandaya azarkeşlik edirsən? Kim titula daha yaxın görünür?
- Braziliyanı dəstəkləyirəm və çempion olacağını da düşünürəm.

ABDULLA İSMAYILOĞLU