Füri Çisoranı məğlub etdi və Usikə barmaq silkələdi
“İndi gülə bilərsən, ancaq bu gülüşü sənin üzündən siləcəm”
Football-plus.az xəbər verir ki, şənbədən bazara keçən gecəni boks həvəskarları maraqla gözləyirdi. Axı superağır çəkidə WBC çempionu, britaniyalı Tayson Füri həmvətəni Derek Çisora ilə döyüşdə titulunu qorumalıydı. 34 yaşlı Füri bu döyüşdə texniki nokautla qalib gəldi. Rinq hakimi 10-cu raundda Çisoranın vəziyyətini, buraxdığı zərbələrin sayını və hücum etmək imkanının olmadığını nəzərə alıb, döyüşü dayandırdı.
Xatırladaq ki, bu, adı çəkilən boksçuların 3-cü döyüşü idi. 2011-də Füri hakimlərin qərarı ilə qalib elan olunmuş, 2014-də isə yenə də 10-cu raundda texniki nokautla qalib gəlmişdi.
Titulu uğurla qoruyan Füri Londonda keçirilən döyüşün tamaşaçıları arasında olan Aleksandr Usikə birbaşa müraciət edib:
“Dovşan, hardasan? Balaca ..., növbə sənindi. Səni məhv edəcəm! Kiçik eybəcər! Səni dəfn edəcəm! İndi gülə bilərsən, ancaq bu gülüşü sənin üzündən siləcəm. Usiki istəyirəm. O döyüşməsə, Co Coys gəlsin. İstənilən yerdə döyüşməyə hazıram”.
Peşəkar rinqdə məğlubiyyət tanımayan (24-ü nokautla olmaqla 33 qələbə, 1 heç-heçə), 3-cü dəfə titulunu qoruyan Fürinin, yəqin ki, belə danışmağa əsası var. WBA, WBO və IBF versiyaları üzrə dünya çempionu Usik isə sonuncu döyüşünü avqustda Fürinin həmvətəni Entoni Coşuaya qarşı keçirib və hakimlərin qərarı ilə qalib elan olunub.
Məğlubiyyətin şokunu üzərindən atan Çisora da bu döyüşlə bağlı danışıb:
“Referi hər şeyi düz etdi. Mən rinqdə o qədər də fəal deyildim. Döyüşçülər heç vaxt təslim olmaq istəmirlər, məhz bu üzdən rinqdə referilər dayanır. Ailələrimizin yanına sağlam qayıtmalıyıq. Döyüş şən keçdi, xoşuma gəldi. Hələ ki karyeramı bitirmirəm. Şeytana lənət! Və yeni döyüşlər istəyirəm”.
Digər xəbərlər
