Derbi ərəfəsində son durum: “Neftçi”də 1, “Qarabağ”da 4
Premyer-liqanın 16-cı turunun açılış oyununda “Neftçi” “Qarabağ”ı qəbul edəcək.
“Football-plus.az” xəbər verir ki, Azərbaycan derbisinə maraq olduqca böyükdü. Bir çoxları bu görüşün çempionatın taleyinə təsir edəcəyini düşünür. Görəsən, komandaların düşərgəsində durum necədi? Həm “Neftçi”də, həm də “Qarabağ”da hansı problemlər var? Məsələyə aydınlıq gətirmək üçün hər iki klubun rəsmilərinə müraciət etdik. Əvvəlcə flaqmanın Media, Marketinq və İctimaiyyətlə Əlaqələr Departamentinin rəhbəri Rüstəm Allahverdiyev “ağ-qaralar”ın görüşdən öncə son durumu haqda məlumat verdi:
“Komanda tam olaraq oyuna köklənib. Şükürlər olsun ki, cəzalımız yoxdu. Zədəlilərdən, sadəcə, Stankoviçin durumu kritikdi. Serbiyalı müdafiəçi hazır deyil. Düzdü, bu gün komandanın yenə məşqi var. Şükür Allaha ki, zədəsi olan başqa futbolçumuz yoxdu. Ümid edək ki, başqa da olmayacaq. Komanda bu gün hazırlığı tamamlayacaq və oyunun başlama saatını gözləyəcək”.
“Qarabağ”ın mətbuat xidmətinin rəhbəri Gündüz Abbaszadə də “Neftçi” ilə oyun ərəfəsində “köhlən atlar”ın son durumu haqda məlumat verdi:
“Hansısa cəzalı futbolçumuz yoxdu. Marko Veşoviçlə Filip Ozobiç zədəlidi. Onlar bu görüşdə iştirak etməyəcək. Marko Yankoviçlə Abbas Hüseynovun durumu isə hələ ki bəlli deyil”.
İLKİN SULTANLI
Digər xəbərlər
