“Neftçi”dən etiraz: “Azərbaycan futbolu naminə oyun təxirə salınmalı idi”
Premyer-liqanın 3-cü turunun “Turan Tovuz” - “Qarabağ” matçı təxirə salındı.
Buna səbəb Ağdam təmsilçisinin Çempionlar Liqasının pley-off mərhələsinin cavab görüşündə “Viktoriya” ilə oyun üçün Plzenə yollanmasıdı. “Köhlən atlar” çempionatdakı matçın təxirə salınması üçün əvvəlcə Tovuz təmsilçisinə, daha sonra PFL-ə müraciət edib. Hər iki tərəf təklifi qəbul etdiyindən görüş başqa vaxta keçirilib.
Premyer-liqanın ilk turunda “Neftçi” də “Şamaxı” ilə matçın təxirə salınmasını istəmişdi. Lakin “şirlər” bu təklifi qəbul etmədiyindən PFL flaqmanın arzusunu reallaşdırmadı. Halbuki “ağ-qaralar” həmin görüşdən sonra Vyanaya yollanmalı və Konfrans Liqasının 3-cü təsnifat mərhələsində “Rapid”lə qarşılaşmalı idi. Avstriyada başverənlər və matçın nəticəsi hamıya bəllidi. Görəsən, “Neftçi” “Şamaxı” ilə görüşün təxirə salınmamasını məğlubiyyətin səbəblərindən biri sayır? Sualımızı klubun Media, Marketinq və İctimaiyyətlə Əlaqələr Departamentinin rəhbəri Rüstəm Allahverdiyevə ünvanladıq:
“Şamaxı” ilə oyundan öncə həm kluba, həm də PFL-ə oyunun təxirə salınması ilə bağlı müraciət etdik. Təbii ki, burda əsas söz sahibi rəqib komanda idi. Onlara rəsmi müraciət etmişdik ki, oyun təxirə salınsın. Heç olmasa, matçın Bakıda keçirilməsini istəyirdik. İkinci dövrədə Şamaxıya səfər etməyi daha münasib sayırdıq. Çox təəssüf ki, rəqib bunu qəbul etmədi. Onlar bildirdilər ki, ilk oyun olduğu üçün şəhərdə insanlar həvəslə bu matçı gözləyir. Şamaxıda görüşlə bağlı tədbirlər keçirdiklərini vurğuladılar. Biz də bu səbəbdən həmin gün “Şamaxı” ilə oyuna çıxmağa məcbur olduq. Təbii ki, bu oyun istər-istəməz komandaya təsir göstərdi. Düzdü, əsas heyət üzvlərinin çoxu meydana çıxmamışdı. Amma onlar Şamaxıya getməyə məcbur idi. Bəziləri hətta meydana çıxdı. Suni meydanda 30 dəqiqə oynamaq təbii qazondakı 90 dəqiqəyə bərabərdi. Bu da istər-istəməz futbolçuların yorulmasına səbəb oldu. Azərbaycan futbolu naminə yaxşı olardı ki, rəqib razılıq verərdi. Nə rəqib, nə də PFL bizə bu məsələdə dəstək nümayiş etdirdi. “Turan Tovuz” isə anlayış göstərdi. Onlar “Qarabağ”la oyunun təxirə salınmasına razılıq verdi. Bizdə isə buna imkan verilmədi”.
İLKİN SULTANLI
Digər xəbərlər
