Həftəiçi ölkə kubokunun 1/8 finalında səfərdə “Şamaxı”nı məğlub edərək adını növbəti mərhələyə yazdıran “Turan Tovuz”da qələbəyə görə üzlər gülsə də, bəzi fubolçuların zədələnməsi baş məşqçi Ayxan Abbasovu qayğılandırmaya bilməz.

Onsuz da son vaxtlar zədə səbəbindən optimal heyətlə meydan çıxmaqda çətinlik çəkən “boz qurdlar” bu dəfə Afrikadan gələn xəbərə üzülüb. Belə ki, Cənubi Afrika millisinin növbəti yoxlama görüşündə iştirak etmək üçün vətəninə yollanan Xulu Siyanda sıradan çıxıb.

Anqola ilə 1:1 başa çatan görüşdə forma geyən yığmanın kapitanı ilk yarının əsas vaxtına əlavə olunan dəqiqələrdə zədələnərək meydanı erkən tərk etmək məcburiyyətində qalıb. İkili mübarizə zamanı çiynindən zədə alan müdafiəçi həkim müayinəsinə ehtiyac duyub. Və məlum olub ki, zədə ciddidi. Körpücük sümüyü sınan Siyanda ölkəsində təcili əməliyyat edilib. Klubdan aldığımız məlumata görə, legioner ən azı 6 həftə yataq rejimində bərpa kursu keçməlidi. Bu səbəbdən onun üçün il vaxtından əvvəl başa çatıb. Afrikalı yanvarın ikinci yarısından tez Azərbaycana dönməyəcək.

Onunla yanaşı, “Turan Tovuz”un daha bir legionerinin - Ben-Aziz Daonun da sağlıq durumunda ciddi problem yaşanır. Burkina-Fasodan olan müdafiəçi zədə üzündən 2 aya yaxındı yaşıl sahələrdən uzaq düşüb. Onun sıraya tez dönəcəyi gözlənilsə də, sonrakı müayinələr dizindən aldığı zərbənin əsəb damarlarını zədələdiyini üzə çıxarıb. Premyer-liqanın 8-ci turu çərçivəsində “Zirə” ilə baş tutan qarşılaşmada sıradan çıxan Daonun diz qapağı yükləməyə dözməyərək “atır”. Həkimlər hələ ki onun nə vaxt meydana dönəcəyini proqnozlaşdırmaqda çətinlik çəkir.

RƏŞAD