FİF avtobusla bağlı layihədə yenilik edəcək
"Kəpəz"lə "Turan Tovuz"a avtobus almaq məqsədiylə Futbolun İnkişaf Fondu (FİF) "Turan 100k" və "Kəpəz 100k" layihəsini başlatmışdı.
Layihəyə qoşulan hər kəs həm kluba maddi yardım göstərəcək, həm də klub tarixində kiçik də olsa, yer tutacaqdı. Maraqlıdı, hazırda layihənin icrası necə gedir? Komandaların avtobus alması üçün lazım olan vəsait toplanıb?
Bu suallara cavab tapmaq üçün FİF-in kommunikasiya meneceri Mehriban Mürsəlovaya müraciət etdik:
“Hazırda “Turan 100k”da 842 piksel satılıb, 6298-i qalıb. “Kəpəz100k” layihəsində isə 746 piksel alınıb, 6394-ü qalıb. İlk aylarda fəallıq müşahidə olunurdu. Həmin nəticələr təhlil edilib və hazırda yeni təbliğat dalğası, həmçinin korporativ satışların artırılması üzərində işlər gedir. Korporativ satışda qiymətlər fərqli olmaqla yanaşı, şirkətlər şəkil yerində öz loqolarını yerləşdirə bilər. Onu da qeyd edim ki, layihə növbəti mövsümə qədər nəzərdə tutulub".
"Turan Tovuz" mövsümlük biletləri də satışa çıxarmışdı. Hər biri 59 manata olan bileti əldə edən azarkeşlər komandanın ev oyunlarını izləməklə yanaşı, klubun atributunu da əldə edirdi. Mehriban xanımla söhbətdə bu məsələ ilə də maraqlandıq:
"500 biletdən 252-si satılıb. 200 bilet isə “Mina və Partlamamış Hərbi Sursatların Təhlükəsinə dair Məlumatlandırma Ayı” layihəsi çərçivəsində endirimli qiymətlə tərəfdaşlar tərəfindən alınıb. Kəndlərdə görüşlər zamanı hədiyyə olunacaq. Hazırda 48 bilet qalıb. Endirimli qiyməti 46 manatdı. İstəyən azarkeşlər kluba müraciət edə bilər".
ŞAİR ABDULLA
Digər xəbərlər
