Cavid Hüseynov: “Sadəcə, əlimlə qırmızı vərəqə verməsinin qarşısını almaq istədim”
Ölkə kubokunun 1/8 final mərhələsində “Şamaxı” doğma meydanda “Turan Tovuz”a 0:1 hesabı ilə məğlub oldu.
Oyundan sonra isə meydan sahiblərinin məşqçisi Cavid Hüseynov baş hakim tərəfindən qırmızı vərəqə ilə cəzalandırıldı. Hətta hakim “qırmızı” verərkən gənc mütəxəssisin ona əl hərəkəti ilə etiraz etdiyi də kadrlarda görünür.
Qarşılaşmanın gərginliyini nəzərə alsaq, əsəblərin tarıma çəkildiyini anlamaq olar. Lakin maraqlıdı, Cavid Hüseynov nə etdi ki, Vüqar Həsənli onu cəzalandırmaq qərarına gəldi? Görəsən, mütəxəssis “qırmızı” alandan sonra əl hərəkətini nə məqsədlə etmişdi? Bu suallara cavab tapmaq üçün Cavid bəylə əlaqə saxladıq: “Hadisələrin bu yerə gəlib çatmasını istəməzdim. Amma futbol emosional oyundu, mən də biranlıq emosiyalara qapıldım. Dünənki oyunda da bir neçə epizod var idi ki, komandamız əks-hücuma çıxanda rəqib kobudluqla qarşımızı aldı, ancaq hakim heç birində sarı vərəqədən istifadə etmədi. Bir epizodda da komandamız Elvin Məmmədovla sürətli potensial qol təhlükəsi yarada biləcək hücuma çıxanda yenə eyni hal təkrarlandı. Oyunun əsas vaxtına artırılan dəqiqələrdə rəqib əvəzetmədən istifadə etdi. Bu zaman meydanı tərk edən futbolçu çox yavaş şəkildə kənara gəlirdi. Amma hakim ona nəinki xəbərdarlıq etdi, heç mərkəzdə dayandığı yerdən belə tərpənmədi. Bütün bunların səbəbini öyrənmək üçün oyunun sonunda hakimə yaxınlaşdım. Səbəbini soruşanda "məndən soruşma, yoxsa qırmızı vərəqə verəcəm" dedi. Fikrini öyrənmək istəyəndə cibindən “qırmızı” çıxardı. Əllə vurmağa gəlincə, bundan söhbət belə gedə bilməz. Sadəcə, əlimlə qırmızı vərəqə verməsinin qarşısını almaq istədim. Belə bir oyunda bizim komandaya qarşı hakimin qərarları heç anlaşılan deyildi. Belə yanaşmanı həqiqətən başa düşmürəm. Biz hakimlərdən kömək istəmirik, sadəcə, qərar verərkən hər iki komandaya eyni tərzdə yanaşsınlar. Geridə qalan 14 oyunun heç birində belə hal baş verməmişdi, hakim qərarlarına etirazımız olmamışdı. Kubok oyunu idi, hər bir qərar qarşılaşmanın taleyini həll edirdi. Bu üzdən də emosiyalar zirvə həddində idi”.
ŞAİR ABDULLA
Digər xəbərlər
