Xəbər verdiyimiz kimi, Türkiyə yığması yoldaşlıq oyunu çərçivəsində noyabrın 16-da Diyarbəkirdə Şotlandiya, noyabrın 19-da Qaziantepdə Çexiya yığmalarını qəbul edəcək.

Qeyd edək ki, qardaş ölkənin komandası ilk dəfə Diyarbəkirdə oyun keçirəcək. Qaziantepdə isə Türkiyə sonuncu dəfə 2001-ci il aprelin 25-də Albaniyaya qarşı oynayıb. Yeri gəlmişkən, “Fənərbaxça”lı Əmrə Morun adı zədə üzündən yığmanın heyətindən çıxarılıb. “Ay-ulduzlular”ın almaniyalı baş məşqçisi Ştefan Kunts “Tivibu Spor” kanalına açıqlamalar verərək bunları deyib:

"Partlayışda dünyasını dəyişənlərə başsağlığı, yaralananlara şəfalar diləyirəm. Qarşıdakı matçları Diyarbəkir və Qaziantepdə keçirmək ümumi bir qərardı. Həm federasiya, həm futbolçular, həm də məşqçilər korpusu bu ideyanı yaxşı qarşıladı. O şəhərlərdə indidən böyük həyəcan hiss olunur və bu da sevindiricidi. Rəqiblərimizi AÇ-2024-ün seçmə mərhələsindəki komandalara uyğun seçmişik. Məsələn, Şotlandiyanın oyun tərzi Uelsin oyun tərzinə uyğundu. Hədəflərimizdən biri yığmanı gəncləşdirməkdi. Yavaş-yavaş bu prosesi həyata keçiririk. 21 yaşı tamam olmayan 10 futbolçuya dəvət göndərmişik. Millətlər Liqası rəsmi matçlar sayıldığından orda çox da rotasiya etmək istəmədik. Həm də o matçlardakı təzyiqlə yoldaşlıq oyunlarındakı təzyiq bir deyil. Ona görə də Arda Gülər, Əmirhan İlkhan, Tayyip Talha Sanuç kimi gənclərin qarşıdakı oyunlarda özlərini daha rahat hiss edəcəklərini düşünürəm. Yeganə qanqaraldıcı məqam Əmrə Morun zədələnməsi oldu. Amma onun sağlamlığı hər şeydən önəmlidi. Çox güman, Merih Dəmiral da qarşıdakı oyunlarda bizə yardım edə bilməyəcək. Heyət seçimində köməkçilərim müəyyən məsləhətlər versə də, son qərarı həmişə özüm verirəm.

Sərdar Əziz və Canər Ərkin əvvəlki toplanışlarda bizimlə birlikdə olub. Onların nəyə qadir olduqlarını zatən bilirəm. Hər zaman onların köməyinə ehtiyac duya bilərəm. Amma budəfəki toplanışa daha gənc oyunçularıl dəvət etmək qərarına gəldim. Migel Krespo Türkiyə yığmasında oynamaq istəyini dilə gətirib? Türkiyə vətəndaşlığını qəbul etsə, onu yığmaya dəvət etmək barədə düşünə bilərəm. Yığmanın baş məşqçisinin seçimləri heç də həmişə hamını məmnun etmir. Bunun fərqindəyəm. Hansısa klub özünü başqası ilə müqayisə edərək narazılığını bildirir. Futbolda belə şeylər olur və hər kəsin düşüncəsi fərqlidi. Tənqidi normal qəbul edirəm. Amma yalan və uydurma xəbərləri sevmirəm. Çünki bunlar komandaya ziyan vurur. Ümumi götürəndə Millətlər Liqasındakı nəticəmizlə ən yaxşı 5 komandadan biri olduq. Amma son matçlardakı nəticələrin ardından sanki neqativ bir ab-hava yaradılıb. Türk dilini universitet səviyyəsində öyrənməyə çalışıram.

Dərslərə gedirik. Təzə dil öyrənmək həmişə çətin və yorucudu. Amma bəzən elə durum yaranır ki, oyunçudan təklikdə nəsə soruşmalı oluram. Ona görə də bəzi cümlələri öyrənmək istəyirəm. Komandada alman və ingilis dilində bilən çox oyunçu var. Anlaşa bilmədiyim oyunçuların sayı azdı. Belə durumlarda tərcüməçi mənə yardım edir. AÇ-2024-ə vəsiqə qazanacağımıza inanıram. Çünki potensialımız buna imkan verir”.