Lüksemburq və Farer adaları ilə oyunlarda qeydə alınan zəif nəticələr üzündən FİFA-nın son açıqladığı ölkələrin reytinq sıralamasında 42-ci pillədən 45-ci pilləyə geriləyən Türkiyə yığmasının qarşıdakı yoldaşlıq oyunlarında rəqibləri bəlli olub.

''Ay-ulduzlular'' gələn ilin martından start götürəcək AÇ-2024-ün seçmə mərhələsinə hazırlıq çərçivəsində noyabrın 16-da Şotlandiya, 19-da isə Çexiya ilə qarşılaşacaq. Bilindiyi kimi bu yığmalar da eyni ilə Türkiyə kimi noyabrın 20-də start götürəcək DÇ-2022-yə vəsiqə qazana bilməyib. Oyunların keçiriləcəyi stadionlar, eləcə də başlama saatları daha sonra açıqlanacaq. Türkiyənin baş məşqçisi Ştefan Kunts sentyabrda verdiyi açıqlamada qeyd etmişdi ki, Şotlandiya ilə oyunun Diyarbəkirdə, Çexiya ilə oyunun isə Qaziantepdə keçirilmə ehtimalı var.