"Vallah, "Neftçi"nin bu məbləği ödəməyə gücü çatmaz" - Tanınmış menecer
“Qarabağ”dan qalmaqallı şəkildə ayrılan Patrik Andrade yenidən ölkəmizdə çıxış edə bilər. Mediada yazılanlara inansaq, kabo verdeli ilə “Neftçi” yaxından maraqlanır.
"Football-plus.az" xəbər verir ki, yarımmüdafiəçi “Partizan”la müqaviləsinə xitam verib, qışda flaqmana keçəcək. Görəsən, bu xəbər nə dərəcədə doğrudu? Andrade yenidən ölkəmizə qayıdır? Bu sualları futbolçunun “Qarabağ”a keçidində vasitəçilik edən menecer Tural Əsgərova ünvanladıq. O, məsələyə belə aydınlıq gətirdi: “Mənim bu məsələdən xəbərim yoxdu. Andradeni “Neftçi”yə təklif etməmişəm. Siz dediz və bildim ki, adı Azərbaycan klubu ilə hallanır. Amma inanmıram ki, “Partizan” futbolçusunu “Neftçi”yə hədiyyə etsin, müqaviləsinin pozulmasına razı olsun. Bundan əlavə, Andradenin Serbiya klubunda elə maaşı var ki... Vallah, eşitdiklərimizi, bildiklərimizi nəzərə alsaq, “Neftçi”nin bu məbləğin yarısını verməyə gücü yoxdu. Bu səbəbdən də düşünürəm ki, bu informasiya tam absurddu. Amma deyə bilərəm ki, Andrade Azərbaycandan və “Qarabağ”dan getdiyi üçün peşmandı. İmkanı olsa, ölkəmizə, amma Ağdam təmsilçisinə qayıtmaq istəyər. “Neftçi”yə gələr? Vallah, bunu yalan deyərəm”.
İLKİN SULTANLI
Digər xəbərlər
