Premyer-liqanın son iki turunda uyğun olaraq “Turan Tovuz” və “Sumqayıt”ı məğlub etməklə adından söz etdirən “Şamaxı”nın məşqçilər korpusunda ayrılıq yaşanıb.

"Football-plus.az" xəbər verir ki, “Şirlər”in fiziki hazırlıq üzrə məşqçisi Miloş Yevtiç komandadan gedib. Mətbuatda serbiyalı mütəxəssisin şəxsi problemlərlə bağlı klubdan ayrıldığı yazılsa da, etibarlı mənbədən əldə etdiyimiz məlumata görə, Yevtiçin “Şamaxı”nı tərk etməsinə uzun illər birgə çalışdığı Kaxaber Sxadadzenin Qazaxıstan “Kaspi”sinin “sükanı arxasına” keçməsi olub. Serbiyalı Tiflis “Dinamo”sunda da gürcü ilə birgə çalışıb. Aralarında olan razılaşmaya əsasən, Sxadadaze özünə iş tapacağı halda, Yevtiç yenidən onun korpusunda çalışacaqmış. Bu barədə “Şamaxı”nın rəhbərliyi də məlumatlı olub. Mənbəmiz onu da qeyd etdi ki, Yevtiçin gedişindən sonra “münəccimlər”in rəsmiləri yeni fiziki hazırlıq üzrə məşqçi axtarışına çıxıb. Böyük ehtimalla yeni məşqçi də ölkə xaricindən dəvət olunacaq.

Məsələ ilə bağlı “Şamaxı”nın baş məşqçisi Vüqar Əsgərlinin də fikrini öyrənmək istədik. Ancaq o zənglərimizi cavabsız qoydu.

RƏŞAD