Futbol dünyasının böyük səbirsizliklə gözlədiyi dünya çempionatı bazar günü Qətər – Ekvador oyunu ilə start götürəcək.

Bu arada Türkiyə çempionatının neçə oyunçu ilə bu turnirdə təmsil olunacağı bəlli olub. DÇ-2018-də belə oyunçuların sayı 21 idisə, bu dəfə superliqa mundiala 20 oyunçu göndərəcək. Əvvəlcə gəlin, bu oyunçuların adlarına diqqət yetirək: Fernando Muslera (Qalatasaray/Uruqvay), Lukas Torreyra (Qalatasaray/Uruqvay), Viktor Nelsson (Qalatasaray/Danimarka), Haris Seferoviç (Qalatasaray/İsveçrə), Dris Mertens (Qalatasaray/Belçika), Romeyn Saiss (Beşiktaş/Mərakeş), Vut Veqhorst (Beşiktaş/Niderland), Atiba Hatçinson (Beşiktaş/Kanada), Corc-Kevin N`Kudu (Beşiktaş/Kamerun), Əli Kərimi (Kayserispor/İran), Məcid Hosseyni (Kayserispor/İran), Bernar Mensa (Kayserispor/Qana), Mişi Batşuayi (Fənərbaxça/Belçika), Enner Valensiya (Fənərbaxça/Ekvador), Yens Strüger Larsen (Trabzonspor/Danimarka), Maksi Qomes (Trabzonspor/Uruqvay), Fransisko Kalvo (Konyaspor/Kosta Rika), Famara Dyedhu (Alanyaspor/Seneqal), Samuel Adekuqbe (Hatayspor/Kanada), Haci Rayt (Antalyaspor/ABŞ). Siyahıdan göründüyü kimi Türkiyə klubları arasında DÇ-də ən çox oyunçu ilə təmsil olunan “Qalatasaray”dı. “Cim-Bom”u 5 futbolçu təmsil edəcək. “Beşiktaş” 4, “Kayserispor” 3, “Trabzonspor”la “Fənərbaxça” 2 oyunçu ilə təmsil olunacaq. Bu oyunçuların bəziləri ilə bağlı maraqlı məqamlar var. Məsələn, 2013-dən bəri “Beşiktaş”ın şərəfini qoruyan və bir sıra rekordların müəllifi olan 39 yaşlı kanadalı veteran yarımmüdafiəçi Atiba Hatçinson bu mundialın ən yaşlı futbolçularından biridi.

Kanada, bilindiyi kimi, sonuncu dəfə DÇ-1986-da çıxış edib. Bu komandanın indiki heyətində Kanada sonuncu dəfə mundialda iştirak edərkən artıq dünyaya göz açan yeganə oyunçu məhz Hatçinsondu. Bundan başqa, “Antalyaspor” da 24 illik fasilədən sonra DÇ-yə oyunçu göndərməyin sevincini yaşayır. Bu komandanın əsas qol silahı, bu mövsüm 12 oyuna 9 qol vuraraq bombardirlər siyahısında 2-ci pillədə qərarlaşan Haci Rayt mundialda ABŞ-ın uğurları üçün tər tökəcək. “Antalyaspor”dan DÇ-yə çağırılan sonuncu futbolçu 1998-ci ildə bolqarıstanlı Qoşo Petkov Ginçev olmuşdu. Bolqarıstanın heyətində həm AÇ-1996-da, həm də DÇ-1998-də yer alan müdafiəçi Fransadakı turnirdə 2 oyunda meydana çıxmışdı. Düzdü, 4 il öncə Rusiyadakı mundialda İsveçrənin heyətində Yohan Curu da yer almışdı. Bu futbolçu 2017/18-i “Antalyaspor”da keçirsə də, DÇ ərəfəsində klubdan ayrıldığı üçün onu bu siyahıya daxil etmək düzgün deyil.