Uğursuz nəticələrə görə çempionatın gedişində Aleksey Baqa ilə vidalaşıb Samir Abasovu “sükan arxasına” gətirən “Sumqayıt” hələ ki istədiyinə nail ola bilmir.

“Kimyaçılar” belaruslu mütəxəssisin dönəmində olduğu kimi, yeni çalışdırıcının rəhbərliyi altında da qələbəyə həsrətdi, turnir cədvəlinin sonunci pilləsində qərarlaşıb. Bu dəfə komandanın durumu ilə bağlı klubun idman direktoru Faiq Hacı-Məhərəmmovla danışmağı lazım bildik.

- Komandanın bugünkü durumu ilə bağlı fikirlərinizi bilmək istərdik. 14 tur geridə qalsa da, hələ ki hesabınızda qələbə yoxdu...
- Həqiqətən çox çətin vəziyyətdəyik. Heç cür “qara zolaq”dan çıxa bilmirik. Amma ümidimizi itirmirik, gələcəyə nikbin baxırıq, işimizi davam etdiririk. Yeni baş məşqçimiz var, onun sistemi oturtmasına da vaxt lazımdı. Əslində son 3-4 oyunda zədəli və xəstə futbolçularımızın çoxluğu da oyunumuza təsir göstərdi. Ancaq dediyimiz kimi, inanırıq ki, bu vəziyyətdən tezliklə çıxacağıq. Fürsətdən istifadə edib, burdan klubumuzun azarkeşlərinə də səslənirəm. Bir az səbrli olsunlar, hər şey yoluna düşəcək. Bu çətin vəziyyətdə onlara da təşəkkür edirəm ki, daim yanımızdadılar.

- Samir Abasovun gəlişi ilə nə dəyişib? Baqanın dönəmində də qələbə yox idi, indi də...
- Samir Abasovun gəlişindən sonra baş verən dəyişiklikləri sözlə ifadə edə bilmərəm. Əsas odu ki, biz dəyişiklikləri görürük və bunun qarşılığında tezliklə nəticələrin gələcəyinə də inanırıq. Bəli, düz vurğulayırsız ki, qələbə yoxdu. Ancaq yenə deyirəm, bir az zamana ehtiyacımız var. Bu vəziyyətdən çıxacağıq. Klub olaraq toparlanmağa çalışırıq.

- Son günlər mətbuatda uğursuz nəticələrə görə bəzi futbolçuların cəzalanaraq əvəzedici komandaya göndərilməsi, maaşların 50 faiz kəsilməsi ilə bağlı xəbərlər dolaşır. Deyəsən, vəziyyətdən çıxmaq, komandanı toparlamaq üçün cəza metodundan yararlanmağı lazım bilmisiz.
- Bu xəbərləri biz də oxuyuruq. Əslində, nəticə olmayan yerdə hansısa cəzanın tədbiqi normaldı. Amma bu gün kiminsə əvəzedici komandaya göndərilməsi və maaşların 50 faiz kəsilməsi haqda xəbər həqiqəti əks etdirmir. Gələcək üçün baş məşqçimiz hansı cəza sistemini seçəcəksə, biz də onu həyata keçirəcəyik.

- “Qara zolaq”dan çıxmaq üçün rəhbərliyin B planı var?
- Bütün klub olaraq bu durumdan çıxmağa çalışırıq. Futbolda belə vəziyyətlər olur. O ki qaldı bu durumdan çıxacağımıza, qarşıdan qış təlim-məşq toplanışı gəlir. Bundan başqa, baş məşqçimiz hazırda yeni futbolçuları izləməklə məşğuldu. Qış fasiləsində heyətdə bəzi dəyişikliklər etməyi də düşünürük.

RƏŞAD