“Kəpəz”in “Şamaxı”nı udmasından sonra premyer-liqada iki komanda qələbəyə həsrət qalıb ki, onlardan biri “şirlər”, ikincisi isə “Sumqayıt”dı.

Bölgə təmsilçisinin zəif çıxışını “yerli, təcrübəsiz gənclərdən formalaşıb” bəhanəsi ilə “sığortalamaq” mümkündü. Bəs “kimyaçılar”ın fiaskosunu necə izah edəsən?

Aleksey Baqa “Qəbələ” ilə matçdan sonra təşkil olunan mətbuat konfransında komandasının bərbad çıxışını statistik rəqəmlərlə ört-basdır etməyə çaılışsa da, görünən odu ki, belaruslu mütəxəssis işinin öhdəsindən gələ bilmir, “Sumqayıt” turdan-tura irəli getmək əvəzinə uçurumun dibinə yuvarlanır.

Belə durumda nə etmək lazımdı? Təbii ki, nəticəyə görə məsuliyyət baş məşqçinin boynundadı. O da yoxdusa, deməli, klub rəhbərliyi ciddi addım atmalı, “sükan arxasına” komandanı “qara zolaq”dan çıxara biləcək mütəxəssis dəvət etməlidi.

“Football-plus.az” saytına daxil olan məlumata görə, artıq “Sumqayıt” rəhbərliyinin də səbri tükənib, Baqa ilə yolları ayırmaq barədə düşünür. Rəsmilər onun boşaldacağı kreslonu isə “Neftçi”dən ayrılandan sonra işsiz qalan Samir Abasova tapşırmağı fikirləşir. Söylənilənlərə inansaq, hətta Samir bəyə təklif də göndərilib. Ancaq 44 yaşlı mütəxəssis hələ ki “Sumqayıt”ın şərtləri ilə razılaşmır. Sənan Qurbanovla Azər Bağırovun da adı “kimyaçılar”la yanaşı hallanır.

RƏŞAD