Qələbəyə həsrət qalan “Sumqayıt”ın rəhbərliyi Baqa ilə bağlı hansı addımı atacaq? – RƏSMİ AÇIQLAMA
Ötən mövsüm bürünc medal qazanan, ölkə kubokunun finalına yüksələn “Sumqayıt” 2021/22 “futbol ili”ndə turnir cədvəlinin “zirzəmi”sində qərarlaşıb.
“Kimyaçılar” son dəfə 2021-ci il noyabrın 10-da “Səbail”i yenməklə azarkeşlərini sevindirib. Həmin vaxt komandanı Ayxan Abbasov çalışdırırdı. 15-ci turdan isə sumqayıtlıların “sükanı arxasına” Aleksey Baqa keçib. Ancaq belaruslu mütəxəssisin gəlişi də vəziyyəti dəyişməyib. “Kimyaçılar”ın uğursuz seriyası davam edir.
Görəsən, klub rəhbərliyi mövcud durumla bağlı nə düşünür, “qara zolaq”dan çıxmaq üçün hansı addımı atmağı planlaşdırır? “Gənclik şəhəri” təmsilçisinin idman direktoru Zamiq Hüseynov “Football-plus.az” saytına açıqlamasında bunları söylədi: “Sözün həqiqi mənasında arzuolunmaz bir vəziyyətlə üz-üzəyik. Komanda olaraq “qara zolağ”a düşmüşük. Bu futboldu, belə vəziyyətlə hər an qarşılaşa bilərsən. Futbol elə bir idman növüdü ki, burda əvvəlcədən nəsə danışa bilmirsən. Son oyunumuza toxunmaq istəyərdim. “Zirə” ilə ağır qarşılaşma oldu. Ümumilikdə kollektiv olaraq pis təsir bağışlamadıq. Amma təəssüf ki, sonda uduzduq. İnanın, bütün futbolçular bu vəziyyətdən qurtulmağı istəyir. Məşqlərdə ab-hava yüksəkdi. Hamılıqla qısa zamanda uğursuz gedişata son qoyacağımıza inanıram”.
Zamiq bəy yeni baş məşqçiyə güvəndiklərini, Baqanın vaxta ehtiyacının olduğunu söylədi: “Aleksey Baqa olduqca təcrübəli və özündən söz etdirməyi bacaran mütəxəssisdi. Məşqçilik dönəmində yetərincə uğura imza atıb, Belarusda, Litvada çempionluq qazanan mütəxəssisdi. İşinin peşəkarı, olduqca səmimi insandı. Onun zamana ehtiyacı var. Çünki fərqli ölkəyə və komandaya gəlib. Öz oyun dəsti-xəttini aşılamaq üçün vaxt lazımdı. Yenə deyirəm, zamanla işlərin yoluna düşəcəyinə inanırıq. Bu müddət ərzində Baqanın işinə qiymət vermək düzgün olmazdı. Öz sistemini və futbolunu aşılaması üçün vaxta ehtiyacı var”.
RƏŞAD
Digər xəbərlər
