Türkiyə yığmasının tarixində ilk dəfə Diyarbəkirdə keçirdiyi görüş uğurlu alınıb.

Dünən türklər bu şəhərdə yoldaşlıq oyunu çərçivəsində Şotlandiyadan 2:1 hesabı ilə üstün olublar. Meydan sahiblərinin heyətində Ozan Kabakla Cengiz Ündər, qonaqların heyətində Con Makqinn fərqlənib. Bu, ''ay-ulduzlular''ın tarixləri ərzində qeyri-rəsmi matçlarda əldə etdikləri yubiley – 100-cü qələbə oldu. Ştefan Kuntsun komandası matçın ardından Diyarbəkirdən Qaziantepə yollanıb. Çünki Türkiyə noyabrın 19-da bu şəhərdə Çexiya ilə qarşılaşacaq. Bu arada 2 futbolçu – ''Fənərbaxça''lı İrfan Can Kahveci və ''Feyenoord''lu Orkun Kökçünün adları heyətdən çıxarılıb. Bu məlumatı Türkiyə Futbol Federasiyasının rəsmi saytı paylaşıb. Xəbərdə qeyd olunub ki, FİFA-nın Oyunçuların Statusu və Transfer Təlimatının 1-ci bölümünün 1-ci maddəsinin 6-cı bəndinə uyğun olaraq bu futbolçular öz klublarının düşərgələrinə geri göndərilib.

''Atalanta''lı Merih Dəmiralın da eyni səbəb üzündən yığmanın düşərgəsinə gəlmədiyi məlum olub. Söhbət ondan gedir ki, nəhəng turnirlər, yəni DÇ və AÇ ərəfəsində yaranan boşluqlar yığmalar üçün ayrılmış ''pəncərə'' sayılmır. Düzdü, nəhəng turnirə vəsiqə qazana bilməyənlər həmin vaxt yoldaşlıq oyunu keçirə bilirlər. Amma klubların artıq bu cür yığmalara oyunçu göndərmək məcburiyyəti olmur. Onlar əvvəlcədən ölkənin federasiyası ilə razılığa gələrək 1 oyundan sonra futbolçunun geri göndərilməsini tələb edirlər. Ya da ''Atalanta'' kimi ümumiyətlə oyunçunu yığmaya göndərməkdən imtina edirlər.