Merih Dəmiral və Çağlar Söyüncüdən fərqli olaraq Türkiyə yığmasının digər istedadlı müdafiəçisi Ozan Kabakın karyerası hələ ki, istənilən səviyyədə alınmır.

Bu mövsümü onsuz da yaxşı keçirməyən Ozanın yaya qədər oynaya bilməyəcəyi məlum olub. 22 yaşlı müdafiəçi Türkiyə yığmasının İtaliyaya qarşı keçirdiyi yoldaşlıq oyununda zədələnmişdi. Onun zədəsinin ciddi olduğu üzə çıxıb. Müqavilə ilə ''Şalke-04''ə məxsus olan Ozan bu mövsümü icarə əsasında ''Norviç''də keçirirdi. Kabak 20 rəsmi oyuna çıxacağı halda premyer-liqa təmsilçisi 13 milyon avro ödəyərək onu daimi əsasda transfer etmək öhdəliyini üzərinə götürmüşdü. Amma Ozan ''Norviç''də cəmi 12 oyun keçirdiyi üçün ''Şalke-04''ə geri dönməli olub.

Helzenkirhen təmsilçisi isə onu müalicə olunması üçün Türkiyəyə göndərib. Futbolçu müalicəsini tamamladıqdan sonra klubun mövsümöncəsi toplanışına qatılacaq. Amma Ozanın yeni mövsümə ''Şalke-04''də başlayacağı gözlənilmir. Klub yayda onu yaxşı qiymətə satmağı planlaşdırır.