FİFA-nın bir neçə ay əvvəl “Kastilyo işi” ilə bağlı təhqiqatı başa vurması bu işdə maraqlı olan tərəflərin növbəti rəsmi etirazına səbəb olmuşdu.

Football-plus.az xəbər verir ki, mübahisəli məsələnin həlli daha üstün instansiyaya ötürülmüşdü. Nəhayət, İdman Arbitraj Məhkəməsi (İAM) “Kastilyo işi” ilə bağlı qərarını verib.

Bu yerdə bir neçə ay əvvələ qayıdaraq məsələnin nədən ibarət olduğunu xatırladaq. Mayın əvvəlində Çili yığmasının vəkili Eduardo Karlesso Ekvador millisinin müdafiəçisi Bayron Kastilyonun əslində kolumbiyalı olması ilə bağlı sübutların olduğunu, buna görə də onun bu komandada oynamaq hüququnun olmadığını bəyan etmişdi. Vəkil Kastilyonun doğum haqqında şəhadətnaməsinə əsasən onun 1998-ci il noyabrın 10-da Ekvadorda yox, Kolumbiyanın Tumako şəhərində anadan olduğunu iddia etmişdi. Bu faktla bağlı materialları mayın 5-də FİFA-ya təqdim edən Çili Futbol Federasiyası (ÇFF) Ekvador yığmasının DÇ-2022-nin seçmə turnirində Bayronun xidmətindən istifadə etdiyi 8 oyunun nəticəsinin ləğvini və bu komandaların rəqiblərinə texniki qələbə verilməsini istəmişdi. Bu halda Ekvador Qətərdə keçiriləcək dünya çempionatında iştirak hüququnu itirəcək və bu imkanı məhz Çili yığması qazanacaqdı: xalların yenidən hesablanması halında Çili Cənubi Amerikada seçmə turnirin yekun cədvəlində Braziliya, Argentina və Uruqvaydan sonra 4-cü yeri tutaraq mundiala birbaşa vəsiqəni təmin edəcəkdi.

Lakin mayın 11-də ÇFF-nin müraciəti əsasında təhqiqata başlayan ali futbol qurumu iyunun 10-da “Kastilyo işi”ni bağlayaraq ÇFF-nin müraciətini əsassız saydı. Təşkilatının yaydığı məlumatda maraqlı tərəflərin 10 gün ərzində FİFA-nın Apellyasiya Komitəsinə müraciət etmək hüququnun olduğu da qeyd edilmişdi. ÇFF dərhal bu orqana da üz tutmuş, ancaq Kastilyonun Ekvador millisində saxta pasportla oynaması ilə bağlı etirazına rədd cavabı almışdı.

Dünya çempionatının noyabrın 20-də start götürəcəyini nəzərə alan çilili futbol funksionerləri inadından dönmək istəmirdilər. Onlar əslində bağlanan “Kastilyo işi”ni İAM-a daşımağı da bacardılar. Maraqlıdı ki, bu təşəbbüsə Peru Futbol Federasiyası (PFF) da qoşulmuşdu. FİFA-nın məlum qərarlarından birgə etiraz edənləri, təbii ki, dünya çempionatına məhz ekvadorluların gec də olsa, cəzalanmasından sonra yollanmaq perspektivi birləşdirirdi. Axı seçmə turnirdə 5-ci yeri tutan Peru yığması qitələrarası pley-offda Asiyanı təmsil edən Avstraliyaya məğlub olmuşdu.
Ancaq ÇFF-nin və bu quruma dəstək verən PFF-nin planı baş tutmayıb. İAM ÇFF-nin istəyini yerinə yetirməyib. Doğrudu, qərargahı İsveçrənin Lozanna şəhərində yerləşən instansiya Kastilyonun Ekvadorda oynamaq hüququna malik olduğunu və Kolumbiyada doğulduğunu təsdiqləyib. Lakin buna görə Ekvador yığmasını qarşıdakı mundialdan kənarlaşdırmağı lazım bilməyib. Şəxsiyyət vəsiqəsindəki saxtalaşdırma bu komandaya başqa sanksiyanın tətbiqini qaçılmaz edib. Ekvador millisi DÇ-2026-nın seçmə turnirinə 3 xallıq cəza ilə başlayacaq. Ekvador Futbol Federasiyası 100 min İsveçrə frankı (100703 avro) cərimələnib. Bu qurum həmçinin məhkəmənin bütün xərclərini ödəməli olacaq.
Beləliklə, “Leon”da (Meksika) oynayan 24 yaşlı Kastilyo Ekvador yığması ilə tezliklə start götürəcək mundialda iştirak edəcək. Yeri gəlmişkən, 60 yaşlı argentinalı Qustavo Alfaronun çalışdırdığı komanda A qrupunda Qətər, Niderland və Seneqalla mübarizə aparacaq.