FİFA-nın “Kastilyo işi” ilə bağlı təhqiqatı başa vurması bu işdə maraqlı olan tərəflərin növbəti rəsmi etirazına səbəb olub.

Football-plus.az xəbər verir ki, mübahisəli məsələnin həlli artıq daha üstün instansiyaya ötürülüb.

Bu yerdə bir neçə ay əvvələ qayıdaraq məsələnin nədən ibarət olduğunu xatırladaq. Mayın əvvəlində Çili yığmasının vəkili Eduardo Karlesso Ekvador yığmasının müdafiəçisi Bayron Kastilyonun kolumbiyalı olması ilə bağlı sübutların olduğunu, buna görə də onun bu komandada oynamaq hüququnun olmadığını bəyan etmişdi. Vəkil Kastilyonun doğum haqqında şəhadətnaməsinə əsasən onun 1998-ci il noyabrın 10-da Ekvadorda deyil, Kolumbiyanın Tumako şəhərində anadan olduğunu iddia etmişdi. Bu faktla bağlı materialları mayın 5-də FİFA-ya təqdim edən Çili Futbol Federasiyası (ÇFF) Ekvador yığmasının DÇ-2022-nin seçmə turnirində Bayronun xidmətindən istifadə etdiyi 8 oyununun nəticəsinin ləğvini və bu komandaların rəqiblərinə texniki qələbə verilməsini istəmişdi. Bu halda Ekvador bu il Qətərdə keçiriləcək dünya çempionatında iştirak hüququnu itirəcək və bu imkanı məhz Çili yığması qazanacaqdı: xalların yenidən hesablanması halında Çili Cənubi Amerikada seçmə turnirin yekun cədvəlində Braziliya, Argentina və Uruqvaydan sonra 4-cü yeri tutaraq mundiala birbaşa vəsiqəni təmin edəcəkdi.

Lakin mayın 11-də ÇFF-nin müraciəti əsasında təhqiqata başlayan ali futbol qurumu iyunun 10-da “Kastilyo işi”ni bağlayaraq ÇFF-nin müraciətini əsassız hesab etmişdib. Təşkilatının yaydığı məlumatda maraqlı tərəflərin 10 gün ərzində FİFA-nın Apellyasiya Komitəsinə müraciət etmək hüququnun olduğu da qeyd edilmişdi. ÇFF dərhal bu orqana da üz tutmuş, ancaq Kastilyonun Ekvador millisində saxta pasportla oynaması ilə bağlı etirazına rədd cavabı almışdı.
Dünya çempionatının noyabrın 20-də start götürəcəyini nəzərə alan çilili futbol funksionerləri inadından dönmürlər. Onlar artıq əslində bağlanan “Kastilyo işi”ni İdman Arbitraj Məhkəməsinə (İAM) daşıyıblar. Bu təşəbbüsə Peru Futbol Federasiyası (PFF) da qoşulub. FİFA-nın məlum qərarlarından birgə etiraz edənləri təbii ki, dünya çempionatına məhz ekvadorluların gec də olsa cəzalanmasından sonra yollanmaq perspektivi birləşdirir. Axı seçmə turnirdə 5-ci yeri tutan Peru yığması qitələrarası pley-offda Asiyanı təmsil edən Avstraliyaya məğlub olub.