13-cü turda "Şamaxı" mövsümdə ilk qələbəsini qazandı. "Aslanlar"ın məşqçisi Cavid Hüseynovla "Turan Tovuz"la səfər oyunundan sonra söhbətimiz baş tutdu.

- "Turan Tovuz" üzərində qələbəylə bağlı təəssüratınız maraqlıdı...
- Tovuz komandasının turnir cədvəlindəki mövqeyinə baxanda bizi çətin səfər gözlədiyini bilirdik. Amma qələbə qazanacağımıza inanırdıq. Əslində, çoxdandı qələbə gözləyirdik. Bununla Ayxan müəllimin komandasını aşağılamaq istəmirəm, amma rəqibdən bir baş üstün oynamaqla 3 xalı qazandıq. Bu qələbə gələcək zəfərlərimizin başlanğıcı olacaq. "Turan Tovuz"la matçdan sonra səhvlərimizi daha detallı təhlil edərək çatışmazlıqları aradan qaldırıb inkişaf edəcəyik.

- Qələbədə əsas pay sahiblərindəm biri Rauf Hüseynli oldu. Futbolçu həm komanda şəklində müdafiə olunmaqda, həm hücumların qurulmasında iştirak etdi, həm də qol vurdu. Onun çıxışından razısız?
- Rauf çox perspektivli futbolçudu. "Zirə"də onunla komanda yoldaşı olmuşam. Yəni, Raufu futbolçu kimi yaxından tanıyıram. "Qarabağ"a qayıtdıqdan sonra uzun müddət ehtiyatda qaldı. Nəticədə bu onun oyun praktikasına təsir etdi. Rauf U-21 millimizin kapitanı və əsas heyət oyunçusu olub. Hazırda pis formada deyil. Amma daha da yaxşı ola bilər. Üzərində hələ çox işləməlidi.

- Rauf müqaviləylə "Qarabağ"a məxsusdu. Onunla icarə müqaviləsini uzadacaqsız?
- Hazırda heyətimizdəki 4-5 futbolçu ilə müqavilənin yenilənməsi üçün danışıqlar aparırıq ki, onların arasında Rauf da var. "Qarabağ"la danışıqlar aparırıq.

- Ümumiyyətlə, qış fasiləsi üçün geniş transfer siiyahınız var?
- 10 futbolçuyla danışıqlar aparırıq. Onlardan heç olmasa 4 təcrübəli futbolçunu sıralarımıza qatmaq istəyirik.

- Transfer siyahınızda Rauf Əliyev də var?
- Ad açıqlamayacam. Amma heyətimizdə təcrübəli futbolçuların yer almasında maraqlıyıq.

- Son oyunlarda Qurban Səfərov ehtiyatda yer alır. Bunun səbəbi intizamsızlıqdı?
- Qurban fərqli xarakterə malik, çılğın, amma perspektivli futbolçudu. "Şamaxı"ya təyinat alanda onunla söhbət etdik. Mənə söz verdi ki, həm komandada, həm də yığmada intizamsızlığa yol verməyəcək. Buna rəğmən, U-21-də yenə intizamsızlıq etdi, hətta qırmızı vərəqə aldı. Onun inttizamsızlığıyla bağlı bizə daha detallı məlumatlar verilmədi. Buna rəğmən, onunla yenə fərdi söhbət, tənbeh və xəbərdarlıq etdik. Nizam-intizam bizim üçün əsasdı. Amma Qurbanın son oyunlarda, o cümlədən "Turan Tovuz"la matçda ehtiyatda qalması sırf taktiki seçimlə bağlıdı.

- 13 tur arxada qalıb. Komandanız daha çox xal toplaya bilərdi?
- Sıfırdan qurulan və gənc yerli futbolçuların yer aldığı komandayıq. "Şamaxı"ya dəvət edilərkən rəhbərliklə ətraflı söhbətimiz baş tutdu. Bütün məşqçi heyətimiz vurğuladı ki, yenidən qurulan, premyer-liqa təcrübəsi olmayan gənclərdən təşkil edilən komandada sabit oyun sərgiləmək, yaxşı nəticə qazanmaq 5-10 günün, 10-15 oyunun işi deyil. Bunun üçün minimum 1 il vaxt lazımdı. Gənc futbolçularımız oyundan-oyuna "artırır". Futbol ictimaiyyəti və medianın da bununla bağlı basqısını hiss edirik. Yuxarıda qeyd etdiklərimdən dolayı daha yaxşı oynaya bilməzdik. Bu mövsüm yaxşı oyunlarımız az olmayıb. Ən azı 4-5 görüşdə rəqiblərimizdən bir baş üstün oynamışıq. Sadəcə, bəxtsizlikdən ya məğlub olduq, ya da heç-heçə etdik.

- Medianın üzərinizdə təzyiqi var?
- Media bizi son pillədə olmağımıza, ardıcıl məğlubiyyətlərə və heyətə legionerlər cəlb etmədiyimizə görə qınayır. Hazırda əsas məqsədimiz yerli futbolçuları inkişaf etdirməklə Azərbaycan futboluna qazandırmaqdı. Amma görünür, ölkə futboluna xidmət etməyimiz heç kimə lazım deyil. Legioner cəlb edib turnir cədvəlində 6-7-ci yerləri tutmaqla futbolumuz nə qazanacaq? Ona görə də hazırda əlimizin altında olan 25 yerli futbolçunu inkişaf etdirmək istəyirik. Bununla perspektivli gənc futbolçuları Azərbaycan millisinə qazandıra bilərik. Məqsədimiz odu ki, ən azı 2-3 futbolçumuz yığmada oynasın. Bütün oyunçularımızın uğurlarında maraqlıyıq.

- Bir mütəxəssis kimi "Qarabağ"ın Avroliqada mübarizəni dayandırması haqda nə deyərdiz?
- "Qarabağ" bu gün futbolumuzu beynəlxalq arenada layiqincə təmsil edən yeganə komandadı. Ancaq xoş sözlərə layiqdilər. "Frayburq"la evdəki matçda da üstün futbol oynadılar. Sadəcə, şans onlardan üz döndərdi. Əvvəlcə hakim penaltini vermədi, sonrakı qolumuz ofsayda görə qeydə alınmadı. Əsas odu ki, Qurban Qurbanov və yetirmələri Azərbaycanı layiqincə təmsil etdir. İnanıram ki, Ağdam təmsilçisi Konfrans Liqasında da uğurla mübarizə aparacaq.


ABDULLA İSMAYILOĞLU