Uğur, uğursuzluq, yoxsa yerində saymaq?
Srağagün “Tofiq Bəhramov”da “Frayburq”la heç-heçə edən “Qarabağ” qrup ikincisi olmaq şansını əldən verdi.
Football-plus.az xəbər verir ki, əvəzində “Nant” səfərdə “Olimpiakos”u yenməklə Avropa Liqasının pley-offuna yüksəldi. Halbuki ilk 3 turdan sonra “Qarabağ” “Frayburq”la birgə qrupdan çıxmağa ən real namizəd göstərilirdi.
Bu yay ölkəmizi Çempionlar Liqasında təmsil edən ağdamlılar Polşa, İsveçrə və Macarıstan çempionlarını mübarizədən kənarlaşdıranda çoxları Qurban Qurbanovun yetirmələrinin Çexiya “Viktoriya”sına da eyni aqibəti yaşadacağını düşünürdü. Ancaq Şahruddin Məhəmmədəliyevin axmaq səhvi səbəbindən “köhlən atlar” Avropa Liqasına üz tutmalı oldu.
Yuxarıda qeyd etdiyimiz kimi, səviyyəsinə görə qitənin ikinci turnirinə də “Qarabağ” uğurlu start verərək, azarkeşləri sevindirdi. Lakin son üç oyunda uğursuzluq yaşayan komanda qrup üçüncüsü kimi yazda Konfrans Liqasının pley-offunda oynamaq hüququ qazandı. Bunu “Qarabağ”ın adına uğur kimi yaza bilərik? Bu sual ətrafında fikirlər haçalanır. Bəziləri Çempionlar Liqasının qrupunun astanasında olan komandanın sonda Avropa Liqsının da yox, Konfrans Liqasının pley-offuna yüksəlməsini uğursuzluq kimi dəyərləndirir. Bəziləri isə əksinə, bunu da kollektiv adına yüksək nəticə kimi qəbul edir. Maraqlıdı, idman mediası, futbol sahəsində çalışanlar bu mövzu ilə bağlı nə düşünür?
Ceyhun Əliyev (sport24.az saytının baş redaktoru):
“Məsələyə obyektiv yanaşmaq lazımdı. Ağdamlılar Çempionlar Liqasının qrupuna düşməyə çox yaxın idi. Bu aspektdən yanaşdıqda, fikrimcə, ÇL-in qrupunda oynamaq və mübarizəni məhz orda dayandırmaq daha parlaq qiymətləndirilməliydi. Lakin məlum “Şahani gediş” və yalnız Avropa Liqasının qrupu. Açıq deyək, həm ilkin mərhələlərdə, həm də qrup mərhələsinin püşkü atılandan sonra “bu da son” deyə fikirləşənlərin sayı ümumilikdə 50 faizdən çox olub. Ancaq “Qarabağ” cari avrokubok mövsümündə tam fərqli obrazda çıxış edir. Qurban Qurbanovun yetirmələrinin oyununa valeh olmamaq olmur. İsti başla hər büdrəmədən sonra konkret səhv buraxan oyunçuları tənqid etmək olar. Elə son matçdan sonra da yetərincə antiqəhrəman adı çəkmək mümkündü. O cümlədən belaruslu hakimi heç də Zelenkadan az yad etməmək haqqımızdı. Lakin bir gündən sonra məsələyə fərqli baxıram. Qurban Qurbanovun komandası yeni səviyyəyə qalxıb. O səviyyəyə ki, heç vaxt belə hündürdə dayanmayıb. Məni nəticədən çox məhz bu səviyyə maraqlandırır. Belə oyunla nəticənin gəlməsi qaçılmazdı. Sadəcə, istər məşqçilər heyətinə, istərsə də futbolçulara bir qədər də təcrübə lazım idi ki, fikrimcə, bu mövsum həmin çatışmazlığı aradan qaldırmaq üçün yetərli oldu. Cari avrokubok mövsümü start götürməmiş çempionumuzun yazda Konfrans Liqasında çıxış edəcəyini proqnozlaşdırırdım və bunu normal hesab edirdim. Ancaq bütün mərhələlər üzrə püşkdəki nəticələri və sərgilənən futbolu nəzərə aldıqda “Qarabağ”ın cari mövsüm avrokubokdakı çıxışını 5 ballıq şkala ilə 6 balla dəyərləndirirəm”.
Səbuhi Səfiyarlı (agent):
“Fikrimcə, “Qarabağ”ın vacib olan son oyunda qələbə qazana bilməməsinin, oyunçuların fərdi səhvlərə yol verməsinin səbəbi soyuqqanlı ola bilməmələridi. Bu həm ehtiyat oyunçular skamyasında oturanlara, həm də ilk dəqiqələrdən meydana çıxanlara aiddi. Ağdamlılar Avropa Liqasında pley-off oynayacaqlarını düşünüb, onun gətirdiyi basqının altında çıxa bilmədilər. İlk dəqiqələrdə komandanın oyunu alınırdısa, vaxt ötdükcə o həyəcan özünü göstərirdi. Futbolçular çox sadə səhvlərə yol verirdi. Çempionlar Liqasının təsnifat mərhələsində “Qarabağ” soyuqqanlı oyunu ilə seçilirdi. Biz bunu “Sürix”lə, “Ferentsvaroş”la matçlarda görmüşük. Niyə qeyd etdiyim mərhələlərdə Qurban Qurbanovun komandası özünü göstərə bildi? Çünki Ağdam təmsilçisi həmin mərhələlər üçün böyüyüb. Və ordakı gərginlik onun üçün həyəcan yaratmır. Ancaq Avropa Liqasında pley-off oynamağın gətirdiyi gərginlik səbəbindən vacib oyunda həyəcanı boğa bilmədilər. Qurban Qurbanovun təbirincə desək, komanda hələ o səviyyədə böyüməyib. Əslində qrupda qeyri-adi heç nə baş vermədi. Püşk atılarkən hamı Almaniya və Fransa təmsilçilərinin favorit olduğunu söyləmişdi. Hətta fikirləşirdik ki, “Qarabağ” 3-cü yer uğrunda “Olimpiakos”la mübarizə apara biləcəkmi? Həmin mübarizədən də təmsilçimiz alnıaçıq çıxdı. Bu üzdən Konfrans Liqasının pley-offuna vəsiqəni də böyük nəticə kimi qəbul edə bilərik. Qurban Qurbanovun yetirmələrinin bu uğurunu kiçiltmək, adi nəticə kimi qələmə vermək düzgün olmaz. “Qarabağ” ikinci dəfə bunu bacarmaqla ötənilki nəticənin təsadüf olmadığını da sübut etdi. Açığı, mən başa düşmürəm ki, niyə bəziləri komandanın Konfrans Liqasının pley-offuna yüksəlməsindən narazıdı? Bəli, Avropa Liqasında pley-off oynamaq daha yaxşı olardı. Ancaq reallıq hissini də itirmək lazım deyil. Hansı meyarı istəyirsiz, müqayisə edək. Oynadığı çempionat, klubun büdcsəi, futbolçuların ustalıq səviyyəsi, onların aldığı maaş – bunların hamısını götürsək, “Qarabağ” qrupdakı rəqiblərindən çox geri qalır və hətta turnir cədvəlində qabaqladığı “Olimpiakos”dan da bütün meyarlarda geridədi. Məncə, ağdamlıların bu nəticəsini belə, başından yuxarı tullanmaq kimi qəbul etmək lazımdı”.
RƏŞAD
Digər xəbərlər
