“Qarabağ”ın “Nant”ı darmadağın etməsi futbol ictimaiyyətinin “köhlən atlar”a inamını daha da artdı.

Artıq çoxları Qurban Qurbanovun komandasının qrupdan çıxacağını düşünür. Qarşıda hələ 4 oyun var. Hətta “Qarabağ” bu qrupdan lider kimi 1/8 finala da vəsiqə qazana bilər. Bəlkə də hadisələri qabaqlamağa ehtiyac yoxdu. Lakin gələcəyi düşünmədən də inkişaf edə bilməzsən.

“Qarabağ”ın qışdan sonra da mübarizəni davam etdirməsinin iki yolu var. Birinci yol qrupda ilk iki pillədən birində qərarlaşaraq Avropa Liqasında davam etməkdi. İkinci yol qrupun üçüncüsü kimi Konfrans Liqasının pley-offunda oynamaqdı. Gəlin, minimum hədəfə fokuslanaq. “Qarabağ” Konfrans Liqasında mübarizə aparmaq üçün nə etməlidi? Avropa Liqasında yola davam etmək, yoxsa daha aşağı səviyyəli turnir haqda düşünmək daha məqsədəuyğundu? Əvvəlcə ikinci sualın cavabından başlayaq. Əlbəttə, qrupda ilk 2 yerdən birində qərarlaşmaq “Qarabağ”a və Azərbaycan futboluna daha çox sərf edir. Həm klub reytinqində, həm də əmsallar cədvəlində daha çox irəliləyə bilərik. Qrupda əldə olunacaq qələbələrə və heç-heçələrə görə ağdamlılar xal ehtiyatını artıra bilər. Bu da gələcəkdə ölkə klublarının hamısının daha münasib rəqiblərlə qarşılaşmasına səbəb olacaq. Bunlar bildiyiniz məsələrdi. Bu məqamlar ətrafında çox danışmağa gərək yoxdu.

İndi isə gəlin qış fasiləsindən sonra avrokuboklarda yola davam etmək haqda danışaq. Növbəti 2 görüşdə ağdamlıların rəqibi “Olimpiakos”du. Məhz bu oyunlarda “köhlən atlar” hər şeyi həll edə bilər. Pirey təmsilçisi bu mövsüm avrokuboklarda qələbə qazana bilməyib. Heç-heçələr və penaltilər seriyası ilə bura qədər gəlib çıxıblar. Ağdamlılar bu məqamdan istifadə etməlidi. İlk oyun Yunanıstandadı. Qurban Qurbanovun komandası bu görüşdə minimun heç-heçə etməlidi. Bu nəticə əldə olunsa, Bakıda pireyliləri məğlub etmək mümkündü. Qurban Qurbanovun komandası bu 2 görüşə maksimum köklənsə, hədəfə çatmaq olar. “Olimpiakos”dan alınacaq 4 xalla avrokuboklarda yola davam etməyi təminat altına alacaq. Son 2 oyunda məğlub olsaq belə, heç nə dəyişməcəyək. “Olimpiakos”dan 4 xalın alınması Avropa Liqasındakı taleyimizə də təsir edə bilər. Belə ki, “Nant” da böyük ehtimalla “Frayburq”la görüşlərdə ən azı 1 xala ümid edir. Belə olan halda 4 turdan sonra “Qarabağ”ın 7, fransızların 4 xalı olacaq. Nantda keçiriləcək görüşdə qeydə alınacaq heç-heçə isə ağdamlıların Avropa Liqasında yoluna davam etməsini təmin edəcək. İstənilən halda, yunanlardan alınacaq 4 xal “Qarabağ”a çox fayda verəcək. Bu meydan, bu şeytan! Oyunçu aparsın!

İLKİN SULTANLI