“Qarabağ” hazırda Azərbaycan futbolunun ən yaxşısıdı.

Bunu heç kim dana bilməz. “Köhlən atlar” gündən-günə inkişaf edir. Ötən mövsüm Konfrans Liqasının pley-offunda mübarizəni dayandıra komanda üçün bu il hədəflər tam fərqli idi. Cari “futbol ili”nin əvvəlində hamı komandanın Çempionlar Liqasının qrupuna vəsiqə qazanacağını düşünürdü. Amma Polşa, İsveç və Macarıstan çempionlarını mübarizədən kənarlaşdıran Qurban Qurbanovun komandası pley-offda “Viktoriya”ya “ilişdi”. Üzücü məqam olsa da, nəticəni qənəatbəxş saymaq olardı. Çünki ağdamlılar yoluna Avropa Liqasının qrupunda davam edəcəkdi.

“Köhlən atlar” turnirə “Frayburq” məğlubiyyəti ilə başladı. Daha sonra evdə “Nant”, səfərdə “Olimpiakos” 3:0 hesabı ilə darmadağın olundu. Artıq hamı Azərbaycan çempionunu növbəti mərhələdə görürdü. Hədəf sadə idi: son 3 oyunda cəmi 3 xal toplamaq pley-off üçün kifayət idi. Amma şərait fərqli idi. Hər 3 görüşdə heç-heçə etməklə də buna nail olmaq mümkün idi. Görünən o idi ki, Qurban Qurbanov bunu planlaşdırırdı. “Olimpiakos”la Bakıdakı oyun ürəyimiz istəyən kimi olmadı. Rəqibi öz qapısına sıxsaq da, qalib gələ bilmədik. Hesabın açılmadığı görüşdə ağdamlıların qazancı 1 xal oldu. Bu 1 xal komandanı ən azı Konfrans Liqasının pley-offuna çıxarsa da, “Frayburq”un “Nant”ı məğlub etməsi “Qarabağ”ın Avroliqada pley-off şansının daha da artmasına səbəb oldu. Qarşıda bir hədəf var idi: Fransadan 1 xalla dönmək və Azərbaycan futbolu üçün növbəti tarixi yazmaq.

Bunu hamı arzulayırdı. Hətta PFL Ağdam təmsilçisinin daha çox istirahət etməsi və oyuna yaxşı hazırlaşması üçün 11-ci turun “Turan Tovuz”la görüşünü cümə axşamına təyin etmişdi. Bu, Azərbaycan futbolu naminə edildi. Lakin “Qarabağ” vəzifənin öhdəsindən gələ bilmədi. Oyunda başverənləri hamı bilir. Şahruddinin yersiz səhvi, son dəqiqələrdə buraxılan qol və ağdamlılar Fransa səfərindən əliboş qayıdır...

Bu məğlubiyyət “Qarabağ”ın “əlinin zəifləməsinə” səbəb oldu. 3-cü turdan sonra hamı “köhlən atlar”ın “Frayburq”la qrup birinciliyi uğrunda mübarizə aparmasını istəyirdi. Bunun üçün əsas da var idi. Lakin son 2 görüşdə klub olaraq böyümək təfəkkürünün inkişaf etməməsi “Qarabağ”ı tarixi uğurdan etdi. Burda fərdlərin səhvlərindən danışmaq və ya minimum hədəf olan Konfrans Liqasının pley-offunu göstərmək günahdı. Hərtərəfli böyümək üçün daha böyük uğurlar əldə etməlisən. Bugünün reallığı Avropa Liqasının pley-offuna vəsiqə qazanmaq idi ki, Ağdam təmsilçisi özünü çətin duruma saldı.

Bir çoxları qeyd edir ki, Konfrans Liqasına getmək daha sərfəlidi. Onlar düşünürlər ki, Avropa Liqasının pley-offunda “Barselona”, “Yuventus”, “Ayaks”, “Şaxtyor”, “Sevilya”, “Zaltsburq” və ya “Dinamo” (Zaqreb) kimi klublara qarşı oynayıb uduzmaqdansa, daha aşağı reytinqli turnirdə irəli getmək olar. Məntiqlə düzdü. Amma gəlin məsələyə başqa tərəfdən baxaq. Avropa Liqasında pley-offa vəsiqə qazanılsa, Ağdam təmsilçisi 623 min 152 avro əldə edəcək. Konfrans Liqasında isə bu rəqəm 276 mindi. Bundan əlavə, futbolçular daha güclü oyunçulara qarşı mübarizə aparıb təcrübələrini artıra, başqa klublara keçmələrinə şərait yarana bilər. Konfrans Liqasında bunu bacaranda səndən La Liqa-2, Liqa 2, PTT 1-ci liqası kimii çempionatların təmsilçiləri oyunçu istəyir. Avropa Liqasında uğur qazananda isə səviyyə artır.

Qayıdaq əsas məsələyə. Bir ay öncə zirvə uğrunda mübarizə aparan “köhlən atlar” bu gün pley-offa vəsiqə qazanmaq üçün çabalayır. Şansımız var, hər şey yenə öz əlimizdədi. “Frayburq”u udursan və vəzifənin öhdəsindən gəlirsən! Ya da Allaha dua edirsən ki, hədəfi qalmayan “Olimpiakos” “Nant”ı udsun. Hətta heç-heçə etsin. Əsas rəqibinə qalib gələn fransızlar buna imkan verər? Futboldu, hər şey ola bilər. Amma bu o qədər də inandırıcı görünmür. Belə olan halda tək çarə almanları Bakıda məğlub etməkdi. Bunu etməyə Qurban Qurbanovun komandasının gücü çatacaqmı?

Son görüşlərdə “Qarabağ”ın uğur qazandığını da görmüşük, əksini də. Bunlarla bağlı nümunə göstərməyə ehtiyac yoxdu. “Frayburq”la oyundan ağdamlıların necə performans sərgiləyəcəyini isə noyabrın 3-də görəcəyik. Həmin matçda sevincə qərq olmağımıza isə Qurban Qurbanovun gedişləri və futbolçuların iradəsi, mübarizə əzmi səbəb olacaq. Hədəf konkretdi: “Frayburq”u ud və tarix yaz!

İLKİN SULTANLI