TFF prezidentindən maraqlı açıqlama: “Azərbaycandan gələn təklifi qəbul etmədik”
Türkiyə Futbol Federasiyasının prezidenti Mehmet Büyükekşi “Anadolu Ajansı”na önəmli açıqlamalar verib.
Football-plus.az xəbər verir ki, federasiya sədri Türkiyə futbolunun yaralı yeri olan hakimlik haqda danışaraq əcnəbi hakimlərin dəvət olunması perspektivinə və Cüneyt Çakırın vida oyununa toxunub:
“Bu yaxınlarda İngiltərə çempionatını təşkil edən yönəticilərlə görüşümüz oldu. Onlardan klub prezidentlərinin oyunlardan əvvəl və ya sonra hakimlər haqda danışıb-danışmadıqlarını soruşduq. “Xeyr, belə şey bizim lüğətimizdə yoxdu” dedilər. Hakimlər haqda danışanlara ağır cəzalar verirlər. Bizdə isə hər uduzan komanda hakimi “qurbanlıq qoyun”a çevirir. Məgər baş məşqçi və ya futbolçu səhv etmir? Onlar kimi hakimlər də səhv edə bilər. Bu o demək deyil ki, hakim pisdi. Hətta bu məsələ dövlət başçımızın da diqqətini çəkib. Bizdə hər uduzan “hakim bizi doğradı” deyir. Bu alışqanlığımızı, futbol mentallığımızı dəyişməliyik! Kim nə gəldi, nə istədi danışır. Halbuki danışdıqları mövzu ilə bağlı həqiqətlərdən xəbərləri yoxdu. Məsələn, bizdə hakimlərin sayının az olduğunu deyirlər. Heç İngiltərədə nə qədər hakimin olduğunu bilirsizmi? Orda 20 komandalı turnirdə cəmi 19 hakim var. Bura VAR hakimləri də daxildi. Bizdə isə 22-23 baş hakim və 12 VAR hakimi var. “Hər dəfə eyni hakimləri təyin edirlər” tipli şikayətlər eşidirəm. O məntiqlə İngiltərədə eyni hakimlərə hətta bizdəkindən də çox oyun verirlər. Klublar inkişaf etmək istəyirsə, səhvi başqa yerdə yox, özlərində axtarmalıdılar. Hakim təyinatlarını kompüter və alqoritmlə həyata keçiririk. Orda təxminən 41-42 meyar var. Bir hakim bir komandanın oyununa 3 turdan tez təyinat almır. Hər həftə qazandıqları xallar, mövsümün əvvəlindən bəri qazandıqları xallar, psixoloji durumları, FİFA hakimi olub-olmamaları kimi bir çox meyar nəzərə alınır. Hakimlərimiz Avropada saysız-hesabsız oyun idarə edib. O matçlarda onlardan şikayət edən olmur! Burda isə obyektivlik olmadığı üçün hamı şikayət edir. Bu mövsüm məni ən çox üzən aşağı liqalardan birindəki matçda yol verilən səhv oldu. Top xətti az qala yarım metr keçsə də, hakim qolu qeydə almadı. Çünki VAR yox idi. Bəribaşdan deyim ki, əsas hakimlərlə bağlı dəyişiklik etmək fikrimiz yoxdu. Başqa ölkədən baş hakim gətirməyə ehtiyac görmürəm. İstisna kimi hansısa ölkə ilə anlaşıb hakim yerdəyişməsi edə bilərik. Onlar bizə, biz də onlara göndərə bilərik. Amma hazırda bu mövzuda heç bir yenilik yoxdu. VAR hakimləri ilə bağlı isə durum bir qədər fərqlidi. Onların sayını 12-dən yuxarı qaldırmaq istəyirik. Çünki hər həftə superliqa və 1-ci liqada ümumilikdə 18 qarşılaşma olur. Qısa müddətdə onların sayını artıra bilməsək, ola bilər ki, xaricdən VAR hakimləri dəvət edək. Noyabr və dekabrda yeni VAR hakimləri tapmağa çalışacağıq. Bizim üçün say yox, keyfiyyət əsasdı. Hakim mübadiləsi mövzusunda ən birinci Niderlandla yazışdıq. Sonra Belçika, Almaniya, Fransa və İngiltərə ilə də ünsiyyət qurduq. Amma onlarda hakimlərin sayı az olduğu üçün baş tutmadı. Azərbaycandan gələn təklifi isə biz özümüz qəbul etmədik. Premyer-liqanın yayın gəliri 4 milyard funt sterlinqdi. Bizdə isə təxminən 120 milyon dollardı. Niyə? Çünki orda heç kim hakimlik haqda danışmır. Heç kim öz malını pisləmir, dəyərdən salmır. Cüneyt Çakıra vida oyunu ilə bağlı söz vermişəm. UEFA-nın da razılığını almışıq. Qarşıda Şotlandiya və Çexiya ilə yoldaşlıq oyunları var. Çexiyanı Qaziantepdə qəbul edəcəyik və o matçın ilk 5 dəqiqəsini Çakır idarə edəcək. Hədiyyəsini təqdim edib onunla gözəl şəkildə vidalaşacağıq. Bizə xaricdə çalışmaq istədiyini deyib. Bizi UEFA-da təmsil edə bilməsi üçün ona bacardığımız qədər dəstək verəcəyik”.
ƏLİ
Digər xəbərlər
