Misli premyer-liqasında 11-ci tura yekun vurulub.

Son matçda "Sabah" "Neftçi"ni məğlub edib - 3:2. Oyundan sonra "bayquşlar"ın çalışdırıcısı Murad Musayevin mətbuat konfransı keçirilib. Sizi mütəxəssisin fikirləri ilə tanış edirik:

- Yayda yeni futbolçular cəlb olundu və bu, komandanın oyununa təsir etdi. Başqa nəyi dəyişdiz?
- Mütəmadi işin bəhrəsidi. Tək mənim yox, rəhbərliyin və futbolçuların da böyük əməyi var. Dayanmamalı, işləməliyik. “Qəbələ” ilə oyuna hazırlaşmalıyıq.

- Bu oyunu Rusiya premyer-liqası matçları ilə müqayisə etmək olarmı?
- Əlbəttə, müqayisə etmək olar. “Qarabağ” “Zenit”lə birgə Rusiyada çempionluğa oynaya bilər. “Neftçi” isə ilk “8-lik”də qərarlaşmaq gücündədi. Ümid edirəm ki, biz də bunu bacararıq. Azərbaycan çempionatı barədə fikrim dəyişib. Bütün gücünü qoymasan heç bir rəqibə qalib gələ bilməzsən.

- 3-cü qoldan sonra komandanın oyununu itirməsi nə ilə əlaqədar idi?
- Bu psixoloji məsələdi. Bir səhv bizə təsir etdi. Kaşuku itirdik. Oyunumuzu itirdik. Rəqib uzun ötürmələrlə təzyiq edirdi. Bu oyun bizim üçün dərs olmalıdı. 90 dəqiqə mübarizə aparmalıyıq.

- Yalnız “Qarabağ”dan geri qalırsız. Onların hegemonluğuna son qoya biləcəyinizi düşünürsüz?
- Səmimi desəm, bu, çox çətindi. Klub çox gəncdi, ilk addımlarımızı atırıq. “Qarabağ”a və turnir cədvəlinə baxmamalı, növbəti oyuna hazırlaşmalıyıq. Komanda ilə 4-5 il işləsəydim, nəsə söz verə bilərdim. İndi konkret nələrsə deyə bilmərəm.

- Davit Volkov “Zirə”də fərqli performans göstərirdi, “Sabah”da hələ ki bunu görmürük. Bunun səbəbi oyun üslubunuza uyğunlaşa bilməməsidi, yoxsa fərqli səbəblər görürsüz?
- Razıyam. Çox böyük potensialı var. Məşqlərdə 100 faiz çalışır. Daha yaxşı oynaya bilər. Fərqli kollektiv, mühitdi. Ümid edirəm ki, istədiyimiz Davidi qarşıdakı oyunlarda daha yaxşı görə bilərik.

- Kaşukun durumu məlumdu?
- Xəstəxanaya apardılar. Ümid edirəm ki, sınma olmayacaq. Ağlayırdı. Həkimlər də narahat idilər.