"Sumqayıt"ın baş məşqçisi Samir Abasov Misli premyer-liqasının XI turunda "Zirə"yə ev məğlubiyyətini şərh edib.

"Footbal-plus.az" xəbər verir ki, o, 0:2 hesabı ilə uduzduqları matçdan sonra "CBC Sport"a açıqlamasında bunları deyib:

"Məğlub olmuşuq. Oyunu dəyərləndirmək çətindi. Matça pis başladıq. Tez də qol buraxdıq. Amma sonra oyunu nizamlamağa çalışdıq. İkinci hissəyə yaxşı başladıq. Oyun nəzarətdə idi. Təəssüf ki, səhvlər 2-ci qolla nəticələndi. Çətinlikləri anlayırıq. Qışa kimi gözləməliyik. Məşqlər və oyunlarla daha çox oyunçu qazana biləcəyimizi düşünürəm. Qışda mütləq güclənməliyik ki, komanda şəklinə gəlib çıxa bilək".

Abasov komandanı çalışdırdığı 4 matçda əvvəlki dövrlə müqayisədə hansı dəyişikliklərin olması ilə bağlı sualı belə cavablandırıb:

"Komanda uduzursa, dəyişikliklərdən danışmağım düzgün deyil. Sadəcə, başqa cür oynamağa başlamışıq. Uduzuruqsa, deməli, yaxşı tərəfə deyil. Mənim üçün aydın olan məqamlar var. Çox çətin vəziyyətdəyik. Oyuna nəzarəti ələ ala bilirsənsə, bu zaman artıq futbolçuların keyfiyyəti ön plana çıxmalıdı ki, son nöqtəni qoya bilsinlər. Kefyiyyət baxımından çox uduzuruq. Qol vəziyyətləri də yarada bilmirik. Cinah ötürmələri saymıram. Deyərdim ki, heç nə dəyişilməyib".