AFFA veteranların “Kəpəz”dən şikayətini elə “Kəpəz”ə göndərib
Bir müddət öncə “Kəpəz”in veteran futbolçuları klubun icraçı direktoru İlqar Nadiri və baş məşqçi Yaşar Vahabzadədən AFFA-ya şikayət məktubu ünvanladı.
Komandanın belə vəziyyətə düşməsinə görə bu iki şəxsi günahkar sayan veteranlar onların istefasını tələb edirdilər.
Görəsən, AFFA-ya ünvanlanan məktuba cavab gəldi? Veteranların səsinə səs verən olacaqmı? Bu suallara cavab tapmaq üçün “Kəpəz”in veteran futbolçusu Firuz Qulami ilə əlaqə saxladıq:
“Məndə məktubun özü də, cavabı da var. Biz məktubda “Kəpəz” rəhbərliyinin yarıtmaz işləri haqqında müraciət eləmişdik ki, burda rəhbərlik dəyişikliyi olsun. Futbolu bilən bir adam icraçı direktor, məşqçi kimi də savadlı biri gəlsin. Məktubumuzun məğzi bundan ibarət idi. Onlar da cavab olaraq dedilər ki, məktuba baxdıq və yolladıq klub rəhbərliyinə. Absurd haldı. Biz “Kəpəz”in rəhbərliyindən şikayət edirik, onlar məktubu həmin rəhbərliyə qaytarırlar. “Kəpəz”in rəhbərliyi özü haqda şikayəti necə müsbət cavablaya bilər ki?”
Firuz Qulamidən baş məşqçi Yaşar Vahabzadə haqda fikirlərini də öyrəndik:
“Mənim Yaşar Vahabzadəyə futbolçu kimi hörmətim var. Heç bir şəxsi qərəzim də yoxdu. Amma biz futbol naminə deyirik ki, Gəncə kimi 500 min əhalisi olan şəhərdə futbolu iki nəfərə görə itirməyək. Bunlar futbolu fikirləşmirlər. Artıq adam bunlar haqda nəsə demək üçün özündən utanır. Bu təkcə mənim fikrim deyil. Veteranlar da, azarkeşlər də bu fikirdədi. Premyer-liqaya yeni qatılan komandadı. Ona görə azarkeşləri, Gəncənin deputatlarını, veteranları yığmaq, görüş təşkil edib planlar haqqında danışmaq da vacib məsələlərdəndi. “Kəpəz”i o qədər hörmətsiz ediblər ki... Kim ki Yaşarla İlqarın komandada qalmasının tərəfini saxlayır, gəlsinlər biz veteranlar və bir-iki nəfər azarkeşlərlə oturaq, 3 dəqiqə söhbət edib soruşaq ki, məqsədiniz nədi? Bu məşqçinin 1-ci diviziondakı işi göz qabağındadı, premyer-liqada nə edəcək? Rəhbərlik dəyişsin, biz komandaya kömək eləməyə hazırıq. Xaricdə yaşayan, Gəncəni sevən bir çox azarkeş bizə müraciət edib. Onlar komandaya məşqçi göndərməyi də, onun pulunu verməyi də öz üzərinə götürürlər. Yerli olmasa, əcnəbi məşqçi göndərmək istəyirlər. Və elə bir məşqçi göndərəcəklər ki, komandadakı yüksəlişi hamı görəcək. Onlar daim bizə zənglər edirlər. “Kəpəz”in vəziyyəti, bu məsələnin nə yerdə qalması barədə soruşurlar. Yəni çox adam var ki, rəhbərliyin dəyişməsini gözləyirlər ki, komandaya kömək etsinlər”.
Məlum olduğu kimi, komanda artıq bir neçə transfer reallaşdırıb. Əvvəllər yığmanın da şərəfini qoruyan Elvin Yunuszadəni, “Neftçi”nin sabiq qapıçısı Kamran İbrahimovu misal göstərmək olar. Görəsən, veteran futbolçu komandadan bu transferlərlə yeni mövsümdə necə çıxış gözləyir? O, sualımıza belə cavab verdi:
“Bu məşqçinin 1-ci divizionda 14 transferi var idi. O bu transferlərlə 7-ci yeri tutdusa, indi 15 legioner gətirsə də, 8-dən yuxarı qalxa bilməyəcək. Komanda elə haldadı ki, sanki meydana “Kəpəz” yox, Yaşar Vahabzadə ilə İlqar Nadirinin komandası çıxır”.
ŞAİR ABDULLA
Digər xəbərlər
