"Birdən-birə düzələsi iş deyil" - Samir Abasov
Misli premyer-liqasında 8-ci tura yekun vurulub.
Son matçda "Sumqayıt" "Kəpəz"i qəbul edib. Hesabın açılmadığı matçdan sonra meydan sahiblərinin baş məşqçisi Samir Abasovun mətbuat konfransı keçirilib. Sizi mütəxəssisin fikirləri ilə tanış edirik:
"İlk oyunum idi. Milli fasilə olmağına baxmayaraq, həmin 10 günü komanda ilə birlikdə olmaq nəsib olmadı. Həftənin 1-ci günündən işə başladıq. 4-5 gün sonra da oyuna çıxdıq. 7 oyundu qalib gələ bilmədiyimizə görə əhval-ruhiyyəmiz bir az yaxşı deyildi. Ümumi oyunu götürəndə bəzən üstünlük bizə keçirdi, bəzən rəqibə. İşimiz hələ qarşıdadı. Bu oyundan görünən odu ki, həddən çox işimiz var. Bunun da öhdəsindən gəlməyə çalışacağıq. Qollar vurmaq, qələbələr qazanmaq istəyirik. Bu, dərhal alınmayacaq. Bizdən gözləntilər böyükdü. Yazıları, şərhləri oxuyuram. Amma birdən-birə düzələsi iş deyil. Bunun üçün vaxt lazımdı. Futbolçulara əzmkarlığa, sona qədər vuruşduqlarına görə "çox sağol" dedim".
- Komandanın problemli mövqeləri hansılardı? Bunun üçün nələr etməyi düşünürsüz?
- Bütün komandalar güclənmək istəyər. Mətbuat konfransına problemləri deyərək başlamadım. Hücumçularımızın ikisi zədəlidi. Bu gün sırf komandanın oyununu düzəltməliyik. Düzəltmək üçün oyunçular lazımdı. Bu barədə rəhbərliklə mütəmadi danışırıq. Problemləri özləri də bilirlər. Yavaş-yavaş hamısını aradan qaldıracağıq.
- Belə bir xəbər var ki, klubla imzaladığınız müqaviləyə əsasən mətbuatda rəhbərlik haqda tənqidi fikirlər səsləndirə bilməzsiz...
- Xeyr, belə bir şey yoxdu. Amma mən yenə də ehtiyatlı danışıram. (gülür)
Digər xəbərlər
