“Red Bull” reqlamenti pozsa da, Ferstappendən titul alınmayacaq
Beynəlxalq Avtomobil Federasiyasının “Formula-1” üzrə dünya çempionatının ötən mövsümü üçün maliyyə hesabatını oktyabrın 10-da açıqlayacağını xəbər vermişdik.
Artıq hesabat açıqlanıb. Komandaların maliyyə hesabatını nəzərdən keçirən qurum “Red Bull” ilə “Aston Martin”i günahkar sayıb. Ancaq hər ikisinin pozuntuları prosedur xarakterlidi və nəticələrin silinməsindən söhbət gedə bilməz. Qalan komandalar qayda pozuntusuna yol verməyib. Reqlamentə görə, büdcə tavanını ciddi şəkildə aşan komandalar ümumi hesabda yerini itirməyə qədər ən müxtəlif sanksiyalarla üzləşə bilər. 2021 mövsümündə “Mersedes”dən 28 xal geri qalmaqla Mühəndislər kubokunda 2-ci yeri tutan “Red Bull” Beynəlxalq Avtomobil Federasiyasının açıqlamasına belə reaksiya verib:
“FİA-nın “vəsaitin xərclənməsi zamanı böyük olmayan maiyyə pozuntusuna” dair iradını təəccüb və məyusluq ilə qarşıladıq. 2021-ci il üçün sifariş ərizəmiz xərclərin mümkün həddindən aşağı idi, bu üzdən qurumun bölüşdüyü hesabatı diqqətlə öyrənməyimiz lazımdı. Hələ də belə hesab edirik ki, müvafiq xərclər son həddi aşmayıb. Başqalarının ehtimallarına və mövqeyinə baxmayaraq, FİA reqlamentinə uyğun proses var ki, biz də buna hörmətlə yanaşırıq”.
Bu arada “Red Bull”un idman məsləhətçisi Helmut Marko da Avstriya komandası 2021 mövsümündə maliyyə reqlamentini pozduğunu görə pilotu Maks Ferstappenin çempion titulunu itirə biləcəyi ilə bağlı şayiələrə reaksiya verib:
“Onu deyə bilərəm ki, biz büdcə limitini aşdığımızı düşünmürük. İndiki məqamda Beynəlxalq Avtomobil Federasiyası ilə danışıqları davam etdiririk. Baxaq görək nəticə necə olacaq, danışıqlar bitməyib. Ferstappenin ötənilki titulu itirə biləcəyi ilə bağlı şayiələr? Boş söz-söhbətdi. Əvvəlki təcrübəyə nəzər yetirsək, görərik ki, FİA ən maksimal qayda pozuntularına belə yumşaq yanaşıb”.
“Reno”nun sabiq pilotu Colion Palmer də Maks Ferstappen haqda danışıb. Nə dərəcədə haqlı olub-olmadığına isə artıq siz qərar verin:
“Anlamaq lazımdı ki, dahilik nədi? Fikrimcə, Lüis Hemilton, Mihael Şumaher və Ayrton Denna “Formula-1” dünyasının əfsanələridi, Maks Ferstappen isə hələ yox. Ancaq bir halda ki, ikiqat dünya çempionudu, elə indidən “böyük” kateqoriyasına düşür. Maks indi qəfil “Formula-1”i tərk etməyə qərar verərsə, biz onu potensialını reallaşdırmayan qeyri-adi pilot kimi xatırlayardıq. Ancaq əminəm ki, hələ çoxlu titul qazanacaq, bu da ona son nəticədə əfsanələr sırasına daxil olmağa imkan verəcək. Əfsanələrin fərqi həm də uzun müddət sabit çıxış etmələrindədi ki, Maks hələ həmin mərhələyə çatmalıdı”.
Xatırladaq ki, Ferstappen oktyabrın 9-da Yaponiya “Qran-pri”sində qalib gəlməklə ikiqat dünya çempionu oldu.
Digər xəbərlər
